شمارات.. سلك | كسير التلج في الشتاء حاااار

*نحن قوم أدمنا كسير التلج بشدة
*فلنا من أدوات كسير التلج أعتى شواكيش النفاق
*وأكبر ماكينات (نفش) التلج
*كلنا بنعبر عن موقف محدد بكسير تلج
*على أساس انو تعبير أكثر احتراماً من ذلك التعبير البلدي
*وطبعاً في أي دولة أو مجتمع في زول رصين
*الناس كلها قايمة وقاعدة
*الرصين الرصين
*والرصين ده مابجي براهو أصلو
*بجي بي جماعتو وبمشي بي جماعتو
*والجماعة البجوا مع الرصين
*ديل كسارين التلج ذااااتهم
*أها
*الرصين كان رفع ايدو
*يرفعوا أياديهم الدنيئة
*الرصين كان رفع رجلو
*يرفعوا رجلينهم تأهباً للانطلاق
*الرصين كان رفع الأسعار
*يرفعوا الأكف شكراً لله ودعاء بطول عمر الرصين
*الناس البجوا مع الرصين ديل حيرونا
*الرصين لو قال أنا غلطان
*يقولوا ليهو حاشاك
*انت الصاح الصحيح
*شغالين زي شغل هامان مع فرعون
*الرصين يفقد السترة ويقعد ساي
*يقولوا ليهو محجب ومنقب سعادتك في الحر ده؟؟؟
*الناس البجوا مع الرصين ديل أس البلاء في البلد دي
*والغريبة معظمهم من الطبقات الفوق
*وشدت ما أدمنوا كسير التلج
*بقوا يكسروا ويصدروا التلج بره كمان
*تلقى واحد منهم بدون مناسبة يمدح ليك الإمارات
*واحد تاني البقولوا في السعودية في المعلقات السبعة مافي زول قالو
*وواحد يمدح ليك مصر لدرجة ممكن يقول فيها أساساً النيل كان بجي من مصر للسودان
*ده غير مدح رؤساء وشيوخ وأمراء و(سيسياء) تلك الدول
*وبعد كسير تلجهم ده
*اذا جات سيرة السودان
*لايترددوا في ترديد ملعون أبوك بلد
*كسير التلج ده بجيب التناقضات
*فكسار التلج عادة بكسر سااااي
*محل ماشاف تلجة بشتتها ليك بضربة واحدة من شاكوش النفاق بتاعو
*عبارة كسير التلج (المهذبة) أنا يخيل لي قصتها الحقيقة تكمن في وجه الشبه بين كسير التلج كمشبه وحركات الناس ديك كمشبه به
*وكسير التلج المعني لايشمل أي تكسير للتلج
*المقصود به كسير ذلك التلج البتشال بالهناية الطويلة ديك مقصوفة الرقبة والبتخت جوة الكباية الشفافة وتتكب عليهو حاجات تانية حامياني وحول الكبابي سراويس الجبن بأنواعه والزيتون يطل بين الكباية والفينة وبعض مخللات يتخللن الوضع مع دندنات جماعية خافتة
*وكسار التلج يراقب
*البنقص بتمو
*والبسخن بكسر ليهو التلج
*اللهم كسر رقابهم أجمعين
*أها
*نجي لي شمارات والي الخرتوم
*كان شفت يا والينا
*نحن لابنكسر تلج ولا التلج بكسروهوا لينا
*لكن المحيرنا يا والينا
*نرفض التدخل الأجنبي في شأننا وترحب بالمبادرة المصرية الجابوها لينا
شمارات الكلب
ننساك كيف والكلب قال التلجة المصرية دي عندكم ليها مزة؟
وإلى لقاء