شمارات.. سلك | وديتها وين يا جبريل؟؟؟؟

*طبعاً واقع الاقتصاد في السودان

*حير علماء الاقتصاد في كل العالم

*وأثبت أن كل النظريات الاقتصادية فاشلة

*وأثبت كمان أن كل تعريفات علماء الاقتصاد للمصطلحات الاقتصادية كلام فارغ ساي

*يقولوا ليك التضخم بيؤدي لزيادة كمية النقود في أيدي الناس ويرفع الأسعار

*في السودان التضخم شغال زي الجلابية الأنصارية

*بشتغل بالجهتين

*مرة يرفع الأسعار

*ومرة يرمي الأسعار في واطات الله دي

*والتضخم البخلي النقود كتيرة في يد الناس ده

*حير الناس

*سيد العقار ماقادر يبيع

*بتاع اللبن ماقادر يبيع

*سيد العربية ماقادر يبيع

*حتى بالكسر في الكرين وقف البيع

*الجزار ماقادر يبيع

*بتاع الفرن ماقادر يبيع

*سيد الموز تلاتة بألف يا الخليتوا الأكل

*خلينا الأكل

*وماقادر يبيع

*حتى الببيع القضية ماقادر يبيع

*بتاع المبادئ طبعاً مابقدر يبيع

*لأنو سلعتو غير مرغوبة في وطن تباع فيه الأشياء الثمينة بأبخس الأتمان برغم التضخم الذي أوصل العملة لأقصى مراحل الانحطاط

*مافي زول قادر يبيع

*وديت القروش وين ياجبريل؟؟؟؟

*تعرف يا جبريل

*قريت البقرة وآل عمران ونمت

*رأيت رؤية

*أشوف ليك آدم اسميث

*أبو الاقتصاديين

*خاتي ايدينو الاتنين في راسو

*وبتشهد

*آمن الكلب

*أول ماشافني كورك لي

*ياسلك….ياسلك

*تعال يا الحبيب

*وجيتو

*خير ياعم آدم مالك محتار كده؟؟؟

*قال لي البحصل في السودان ده شنو؟؟؟ انتوا قاصدين تعروني قدام الناس وتطلعوني أي كلام؟؟؟

*قلت ليهو والله نحنا في السودان قاعدين ساااااي زي قعدتك الفي القبر دي

*لابنطقع لابنجيب الحجار لا بنعترض على قرار لا بنندهش

*قال لي وقاعدين تسووا شنو؟؟؟

*قلت ليهو قاعدين راجيين نشوف آخرتها

*تعرف ياعم سميث عندنا مثل سوداني بقول الكضاب وصلو خشم الباب

*قال لي بالمناسبة دي برهان سلمها ولا لسه؟؟؟

*قلت ليهو وأنت ميت ليك مليون سنة الأخبار دي بتجيبها من وين؟

*قال لي نحنا في الآخرة دي أكتر ناس بجونا السودانيين

*وشماراتكم كلها معانا

*يومي بجونا قريب الفين سوداني

*وفيهم ناس اختاروا المعاش الاختياري

*مدتهم ما انتهت

*ضحكت وقلت ليهو

*تعرف ياعم آدم آخر نكته عندنا في السودان شنو؟؟؟

*قال لي عارفها

*موش بتاعت الزول الراكب الحافلة ولما جات جمب المقابر عاين للمقابر بإعجاب وقال أوعدنا يارب؟

*ضحكنا الاتنين لمن صحيت من النوم

*لقيت طفلتي الصغيرة واقفة جمب السرير شايلة ليها ورقة فئة خمسمية

*قالت لي يابابا دي مابتكفيني للروضة

*تخيلوا شايلة فطورها وعصيرها وبتمشي وتجي بالترحيل وخمسمية ألف جنيه مابتكفيها للروضة

*نمت تاني ليس هروباً من طفلتي ولكن عشماً في لقاء جديد مع آدم اسميث

*أها

*نجي لي شمارات والي الخرتوم

*كان شفت يا والينا

*الدولار كان وصل مليون ولا هامينا

*لانو مصيرها تدكة وتتشكة وتتوزع من جديد

*بس المرة دي بتتوزع علينا

شمارات الكلب

ننساك كيف والكلب قال أنا ذاتي مرة جاني كلب ميت في النوم قال لي يابوبي انتوا عايشين في البلد دي كيف؟ وعشان الأسئلة المحرجة دي الليل كلو بتلقانا صاحيين….

وإلى لقاء

 

#شمارات #سلك  #جبريل #السودان