شمارات بس بعاين بعيوني

*طبعاً أية وظيفة ليها معاينات

*والمعاينات في بلدنا دي بالذات إذا كانت الوظيفة متعلقة بالجنس اللطيف

*بتبقى معاينات جد جد

*معاينات حقيقي

*يتركز فيها النظر على (المؤهلات)

*والمؤهلات هي مهارات فردية لاعلاقة لها بمجرد التأهيل

*لذا تجد الوظيفة العامة عندنا لاحقة أمات طه

*بالذات كمان الأعمال الخاصة

*سماحة جمل الطين

*وتحضرني قصة أحضركم ليها

*قالوا في اتنين موظفين زملاء وأصحاب

*فرقت بينهما الدروب بالتنقلات أيام الحكومة مركزية

*واحد نقلوهوا دنقلا

*والتاني نقلوهوا نمولي

*أيام السودان من حلفا لي نمولي

*كلو شي زاد إلا السودان نقص

*المهم

*الجماعة ديل أربعين سنة ما اتقابلو

*بعد الأربعين سنة

*وطبعاً طلعو معاش

*اتقابلو صدفة في قهوة

*عثمان: يا أخوي أنا زي الشايفك

*عمر: أنا ماشايفك… نظري ضعيف

*عثمان: علي الطلاق من المساخة دي ياكا أنت

*عمر: ياني أنا منو؟؟؟

*عثمان: أنت كنت شغال معانا زمااان

*عمر: شغال معاكم وين؟؟؟؟

*عثمان: في الحكم اللامركزي… موظف

*عمر: صاح كنت شغال هناك… لكن ماعرفتك أنت منو؟

*أنا عثمان…عثمان الماسك السيرك… وأنت عمر…. كان جنك أرانيك

*عمر: أنت عثمان بتاع السيرك الأدوك موتر بقيت تبيع البنزين ومابتودي السيرك؟؟؟؟

*واتقالدو واتسالمو واتحاضنو واتطايبو

*عثمان: وعملت شنو ياعمر؟

*عمر: اتزوجت وجبت لي بنية واااحدة وقطعنا

*عثمان: سبحان الله أنا ذاتي اتزوجت وجبت لي بنية واااحدة

*وبتك أسي قدر شنو؟

*عمر: اتخرجت وأسي شغالة

*عثمان: سبحان الله أنا برضو بتي اتخرجت وشغالة

*وبتك شغالة شنو ووين؟

*عمر: شغالة في شركة خاصة… سكرتيرة المدير…. الشغل كلو في راسها…. لو غابت الشركة حالها بقيف…. وإذا الشركة عندها شغل بره السودان بتي لو مامشت المدير مابمشي… مابعرف يشتغل إلا هي تكون في…. كونتراكت البزنيس بتصيغو هي أي ديالوق بتقوم بيهو هي إقناع الشركات الأخرى بتقوم بيهو هي حتى الكونفيرم لو مامنها مابكون في اتفاق…. تسافر معاهو مرات شهرين تلاتة بره حتى يجوا راجعين

*وأنت بتك شغالة شنو ياعثمان؟؟؟

*بتي مطلوقة زي بتك دي لكن جنس كلامك ده مابعرف أقولو

*أيها الناس

*المعاينات يجب أن تكون على الأوراق والشهادات وبس

*معاينة مباشر نهي بالكل كهية

*وإذا كان لابد

*حقو معاينات الستات يقوم بيها ستات

*زي التفتيش بتاع الشرطة

*أها

*نجي لي شمارات والي الخرتوم

*كان شفت يا والينا

*بي شناتنا دي لو دخلنا معاينة ولابعاينوا لينا

شمارات الكلب

ننساك كيف والكلب قال مرة البطري عاين لي خليت الكشف ورجعت… نظراتو ماعجبتني .

وإلى لقاء

 

 

مصحح