صبري محمد علي يكتب.. إلى الشُرفاء من المحامين (كتِفُوا القحاطة)

خاص بـ{صوت السودان}
مما يُميزُنا نحن كسودانيين عموماً (المهلة) وبُطء الحركة و التلكؤ في اتخاذ القرار
وأسهل (حاجة عندنا) جملة
(كدى خلينا نشوف)
أو (ياخ خلينا نخلص ده بالاول)
ونفتقر لسرعة تحريك عُدة ملفات في وقت واحد
قول ليّ كيفن يا أستاذ ؟
أقول ليك أنا يا صاحبي

(حالين) …..
حمدوك والخموم بتاعو عاملين الدرب مُشرَع بين أديس ومش عارف كينيا وجيبوتي وهكذا ومالين (الميديا) صراخ ومبادرات لتسويق أنفسهم
صاح ؟
طيب نحن كشعب سوداني وعلى طليعتنا طبقة المثقفين أصبحنا مشغولين بشظف المعيشة ومكابدة الحياة
و أصبحنا نتصفح الوسائط ثم (نسخر)
نعم فقط نسخر
من تحركات هؤلاء العملاء والخونة واللصوص
واصبحوا هم بدورهم يغازلون البرهان بالسماح لهم بالعودة للسودان لإيجاد موطئ قدم في الساحة السياسية
أعتقد هذا هو الوضع الحالي وللأسف

طيب ….
ماهو المطلوب ؟
المطلوب ياسيدي هو تحرير العرائض والشكاوي ضد هؤلاء اللصوص والقتلة والمجرمين إبتداءاً من حمدوك وحتى أصغر (متعاون) منهم متذ هذه اللحظة وعدم إنتظار يوم النصر الأكبر

وهذه المُهمة …..
خير من يقوم بها هم السادة المحامين وأهل القانون من شرفاء هذا الوطن

خليك ….
من تعويض المتضررين (وكده) ده موضوع تاني ويجب ان تُشكل له لجنة قومية بمواصفات وخبرات عالية لتعويض المتضررين من هذا الغزو البربري الذي قادته عائلة (آل دقلو) ضد الشعب السوداني

عشان كده يا جماعة
لاااازم (نكتفهم) نعم أقصد كتفوا القحاطة بالقانون
ولن تعدموا المواد التي ستذهب بهم
(خلف الشمس)
و(الكِتّيف) أو (التكّتِيف) هما دارجتان نقصد بهما إحكام الوثاق وشل حركة (البهيمة) قبل ذبحها .

أعتقد أن …..
السيد وزير العدل

جاهز وينتظركم
والسيد النائب العام
(مكفكف قميصو)
و ينتظركم

والمحامين الشرفاء وأهل القانون في بلادي
بسم الله ماشاء الله
ماليين البلد

وجرائم القحاطة في حق الوطن والمواطن
(على قفا من يشيل)
إذاً ما الذي ينقصكم أيها المحامين
الورقة أم القلم؟

لذا أدعو وبالصوت العالي …
لحملة (كتِفوهم بالقانون)
(منننن) شاشات لحمدوك لمنقة لمناع لعثمان لسلك لجرادل للمنصورة لصديق دهب و .. و …..
ولغيرهم من المجرمين الحرامية واللصوص و أرزقية السياسة
الذين أذلوا هذا الشعب الكريم

حتى إذا ما عادوا …..
أخذتهم قوة القانون لا صلاحيات البرهان .

(حاجة نفيسي) …..!!
إنتي وجاراتك وسيد الدُكان وسيد اللبن كل واحد يطلع الفيها النصيب وأقرب محامي من أولاد الحِلة
أبدوا الحملة
(وليكم عليّ)
تاني ما تلقوا عميل واحد حايم في البلد دي …

السيد وزير العدل
السيد النائب العام
هل تسمعون …..
صخب الرعود
صخب الملايين الجياع
يشُقُ أسماع الوجود
ستعودُ (خُرطوم) لنا
وتعُود أنغام الصباح
هل تسمعون ؟

فكونوا على الموعد