اضرب واهرب.. عبدالمنعم شجرابي.. السمع يكلم الما سمع

* في كل بلاد الدنيا ووسط شعوبها ( يد تبني ) و( يد تحمل السلاح ) خاصة البلدان التي تعيش الحروب وللأسف فالمشهد في بلدي غابت فيه اليد التي تبني في وجود يد تحمل السلاح وقديماً قالوا :
( اليد الواحدة ما بتصفق )
*** الحرب بين الجيش والدعم السريع ولا دخل لنا فيها ( وده آخر كلام ) للحركات المسلحة
ويا اخوانا ( يلا السمع يكلم الما سمع )
*** يا ربي الكوتش فلوران متذكر مباراة الهلال الأفريقية فضل ليها كم يوم؟؟ ( غايتو ) يا خالد بخيت ( الراجل ده ) لو ما متذكر ذكرو
*** الخلاصة في البيان الصادر عن محادثات جدة أنها ( مستمرة ) ولم تفشل
( والصبر الصبر سووا الصبر )
*** اساتذتي الأجلاء النعمان حسن .. طلحة الشفيع .. آمال عباس .. بخيتة أمين .. عساكم بخير
مع تحياتي للزملاء أحمد نصر .. وعبد الله رزق .. والزبير سعيد ( عالين المهنية ) والذين ( ظلمتهم ) الصحافة ( وما كانوا لها ظالمين )
*** هل انتهت حاوية الخيش ( بكشف المستور ) أم السيد والي البحر الأحمر ( سحب الملف ) تحت شعار ( عفى الله عن ما سلف )
*** بالمناسبة الملفات في بلادي مثلها مثل ( أي طبلية ) تقفل وتفتح والاختلاف أن بعضها ( كريه الرائحة ) ورائحته ( تشم من بعيد )
*** محاضر الاجتماعات ( سرقت ) .. مستندات الحسابات ( ضاعت ) .. بعض القيادات ( أصيبت ) .. ومستحيل علينا إقامة الانتخابات ( هذا من عندي ) وهذا ما سيقوله قادة الإتحاد العام من أجل ( الكنكشة ) والبقاء بلا سقف زمني وبلا محاسبة فهل تراهنني السيد محمد لطيف الشاعر مساعد الشؤون القانونية .. وبعدك والقانون ( بعد المشرقين؟؟ )
*** الزول ده فتشنا عن حسناتو وما لقينا ليهو حسنة ..
الزول ده قلبنا ملفو ولقينا السلبيات أكتر ..
الزول ده خشينا ميزان ما له وعليه لقينا ما له صفر والعليهو كتير ..
الزول ده ميؤس منو
*** ( سكران لط ) وقع في الواطة جماعة كتار جروا يرفعوه قال ليهم عليكم الله ( ساعدوني بالسكات )
باختصار عاوز أقول لبعض الزملاء الصحفيين الناشطين في مواقع التواصل
( الجيش ده ساعدوه بالسكات )