أضرب واهرب..عبدالمنعم شجرابي.. قلبي ماكلني

** لا مدن جديدة قامت والمدن القديمة ( تآكلت ) .. لا خطط اسكانية لا تعمير والحرب كشفت أننا ( أولاد أمبارح ) وجديدنا هو ( ماضي ) نبكي عليه ومن حقه أن يبكينا
( ويكب التراب في راسو )
*** وا وجعي على بلد كانت لغته ( الحب ) فأصبحت كلماته الحرب
ووا وجعي على الأخضر الذي أصبح رماداً ويا اسفاي ووا اسفاي على ( بسمة ) راحت وحلت مكانها ( الدمعة )
*** والسودان يعيش الأمن والأمان فشل الاتحاد العام في ( التطوير ) فما بالكم والحرب ( مدورة )
ويا أسامة عطا المنان ليس عندكم ما تقدمونه فكفاية ( رملتة ) في جدة اعيدوا المنتخبات ( وطيروا محل ما انتو طايرين )
*** كل ما أعرفه عنه وعرفته عن قرب سبقني في الكتابة عنه أخوه وزملاؤه وزادوني ( المعرفة ) بإضافات أجمل لم أكن أعرفها عنه رغماً عن سنوات معرفتي الطويلة وعليه لا أضيف سوى تعزية نفسي وفايزة وأميرة في فقيدنا الأديب الشاعر السياسي القانوني الاجتماعي كمال الجزولي والعزاء موصول لأحبة ( الصالون الثقافي ) د.كمال عمر والنخلي وهاشم عثمان وعوضة ود.ندى الكردفاني
رحم الله كمالاً بعدد الحصى والتراب
*** الزول ده في أبريل ومايو وأكتوبر ياهو ذاتو
الزول ده في شوال ورمضان ومحرم وربيع ( هو هو )
الزول ده ( كده وحيظل كده ) الزول ده مازول
*** بصافرة ( حاسمة ) ورايات ( حقانية ) برشاقة وحركة ومتابعة ( وحزم وحسم ) وعدل أدار طاقم التحكيم السوداني النهائي الأفريقي بين الوداد المغربي وصن داونز الجنوب أفريقي مستحقاً الإعجاب
تعظيم سلام محمود شانتير ومحمد عبدالله نيالا
( ودمتم رائعين )
*** في فترة الرياضة الجماهيرية وبعد حل الأندية زار وزير الشباب والرياضة زين العابدين محمد أحمد عبدالقادر رئيس المريخ ( المريض وقتها ) ( والمرضان ) بالمريخ وقال خلاص يا حاج حنرجع ليك المريخ بتاعك فرد الحاج شاخور
نان المريخ بدون الهلال اسوي بيهو شنو
وهذه رسالتي ( للأخ هناك )
*** الكلام ده ( ما ياهو ) الشغل ده ( ما مقنع ) والحكاية دي ( ما تمام ) وشخصياً ( قلبي ماكلني )
والمهم أننا دايرن نطمئن فهلا طمنتنا على هلالنا ( فعلاً ) لا ( قولاً ) الكوتش فلوران؟؟؟؟ ياريت