شمارات.. سلك | جبريل وجبرين
*حينما تفيض إنسانية
*تكون قمة الروعة
*والزول الأخلاقو رائعة
*بوصفوهو بانو أخلاقو أخلاق ملائكة
*عليهم السلام جميعاً
*يقولون إن سيدنا جبريل سألوهو
*لو كنت من سكان الأرض
*ماذا تفعل؟
*قال عليه السلام
*أسقي الناس الماء
*ياسلام عليك وعليك السلام
*وإذا سألنا جبرين الأرض نفس السؤال الذي سئل عنه جبريل السماء
*لن يختلف جبرين الأرض مع كلمات جبريل السماء
*أسقي الناس الماء
*بس حايضيف على تلك العبارة كلمة صغييييرة
*بي نخرينهم
*السلام عليكم ياهذا
*معقولة بس
*رسوم قيمتها أعلى من الخدمة المدفوع الأجر لأجلها؟؟؟؟
*معقولة دمغة
*ودمغة على الدمغة
*ودمغة الرسم أعلى من الرسم؟؟؟
*دي موش بي نخرينهم
*دي بي محل تاني
*بي إضنينهم
*كرعينهم
*بأي حتة
*وموش حانموت الله يخلينا
*المهم
*عقدوا ولا لسه؟؟؟
*أقصد وقعوا ولا لسه؟؟؟
*وقعوا ولا وقعوا (التانية بمعنى اتشنقلوا)؟
*ولا الشنقلة محمدانا نحنا؟؟؟؟
*أيها الناس
*البلد دي عيبها وين؟
*فيها
*ولافينا
*ولافيهم
*ولا في القانون
*ولا في القولون؟؟؟؟؟
*ماممكن للدرجة دي
*ياخ سياسي واحد يشعرك بانو السياسة بخيرها مافي
*حقل واحد يحسسك انو الزراعة بخيرها مافي
*مصنع شغال يقنعك بانو الصناعة بخيرها مافي
*منجم يقنعك بانو الدهب دهب البلد
*دهب البنت والولد مافي
*الدهب الروسي
*زي الدب الروسي
*وفي نوع من العمارات للإمارات
*وبالطيارات
*وبعد ده كلو
*عشمنا كبير وأملنا ما انقطع ودايرين نعرس تاني
*التقول عندنا شي
*شي ماعندنا ودايرين نعرس تاني
*لاشغل لامشغلة
*لاوظيفة ولا مرتب
*ودايرين نعرس تاني
*اللهم
*ولا مافي داعي
*وموش حانموت الله يخلينا
*أيها الناس
*حسن الظن بالله هو الشي الوحيد الكاتل قلبنا ومتقلو
*وهي درجة إيمانية عمييييقة
*ليست عقيمة
*لكن برضو حسن الظن ده محتاج عمل
*ربنا ذاتو قال كده
*ونحنا ياعاملين لينا عمل
*يا عافصين لينا عمل
*يا ماشين مكتب العمل نشكي رب العمل
*ورب العمل يشكي لطوب الأرض
*وطوب الأرض يشكي لرب الناس
*ورب الناس رؤوف رحيم
*يمهل
*ويمهل
*ويمهل
*قد يطول الإمهال
*ولكنه لن يتحول لإهمال
*أها
*نجي لي شمارات والي الخرتوم
*والينا المكلف علينا
*ماداير رسوم على الهوا البدخل نخرينا؟؟؟
شمارات الكلب
ننساك كيف والكلب قال زمان من نسمع كلمة رسم نشيل ألواننا ونجري على اللوحة…أسي من نسمع كلمة رسم نشيل أوراقنا ونجري على البيت.
وإلى لقاء
