العيكورة | ياخ الزول ده (شِفِت) بشكل ..!
صبري محمد علي (العيكورة)
امسية الاربعاء يوم امس الاول ….
وبحسب موقع (ماسة نيوز) يقول الخبر …
إن سعادة الفريق البرهان قد اجتمع اليوم بالمبعوثين الدوليين الستة الذين (شرفوا) الخرطوم الثامن من فبراير الجاري ٢٠٢٣م
وإن الاجتماع كان بحضور نائب البرهان السيد حميدتي .
اقول ليك اكتر حاجة …
كيفتني فى الموضوع شنو ؟
اي كلام كان يفترض ان يصدر من السادة المبعوثين بادرهم به البرهان
يعني ريحهم ليك خااالس
فقال ليهم …
مُش الإطاري بتاعكم ده ؟ (علي الطلاق) نحن معاهو تب ونؤيده وبشدة كمان؟
(خلي بالك معاي فى الكلام الجاي ده) …
وقال سنعمل على إقناع الممانعين له للتوصل لاتفاق نهائي وشامل !
اهاااا يا جماعة …
فى زول شامي ريحة للإطاري هنا ؟
تاااني(قال ليهم شامل)
ما قلت ليكم الزول ده (حا) يدخلهم بحمد ويطلعهم بخوجلي !
طيب وتاني (اكد ليهم) حتمية
خروج الجيش عن العملية السياسية فى السودان
(لا) وكمان …
اكرمهم زيادة (حبتين) فى قوله وانه ماض فى اصلاحه وبقية الاجهزة الامنية !
(شفتو الزول ده (شفت) كيف وبالله (فضل ليهم) حاجة يقولوها ؟
فبعد (ما) رقد اباليسهم خااالس يا صاحبي
(خلف رجل فوق رجل)
واتنحنح كده …
وطالب المبعوثين بضرورة الوفاء بالتزاماتهم لدعم الانتقال السياسي وتقديم المساعدات العاجلة للسودان .
يعني (معناتا) يا عب باسط يا اخوي ….
الزيارة انتهت وتفضلوا غير مطرودين)
اهااا …
الجماعة (وكت) الحكاية جابت ليها دفع وكده .
طقطقوا اصابعيهم وكل زول دنقر رويسو وشكروا البرهان (زييين) وقالوا فيما قالوا …
نحن اصلاً يا سعادتك …
(اتينا الى السودان نحمل رسالة امل ودعم للإطاري وللشعب السوداني ) وكده
(اححي يا رُكبي) …!
حرام يا بوبو تعمل كده وتلعب لعب بالشكل ده !
عزيزي القارئ …
الزول ده
(جهجهُم واللا ما جهجهُم)؟
