شمارات.. سلك | مصر السودانية

*سبحان الله

*الحوار السوداني سوداني تحتضنه مصر

*أليس هذا دليلا على الخلاف وعدم تقبل الآخر؟

*ضاقت صدوركم لدرجة ضاق معها السودان الواسع ده على ايجاد دستة كراسي وتربيزة تتحاوروا حولها بمنتهى المودة ومنتهى قبول السوداني للسوداني؟؟؟

*ومصر (خلاس) يعني السودان ده هاميها ومقطع (مصارينا) عشان كدة دايرانا نصل لاتفاق؟؟؟؟

*طبعا المبرراتية حايقولوا لي السودان هو البعد الاستراتيجي لمصر

*واستقرار السودان هو ضمان لاستقرار مصر

*ووحدة وادي النيل

*وكووولنا اخوات

*وكلام من النوع الذي يردده المصريون لما يكون عندهم فريق لاعب مع طرف من اطراف القمة بالسودان

*يكتلوا بيهو قلبنا ويتعادلوا او يفوزوا هنا

*ولما نمشي لي كورة مصر عينك ماتشوف الا النور

*العبيط أهو

*البواب

*يا ابن شنو كدة ماعارف تحل محل ابن النيل!!!

*ونطير

*الحوار السوداني سوداني مفروض يكون جوة سودان الله والرسول ده

*موش اطراف هذا الحوار صرحوا قبل كدة بقولهم

*لا للتدخل الاجنبي في الشأن السوداني؟؟؟

*مصر مامشلخة ولا بتعرف للكول ولا بتتكلم نوبي ولا بتعرف لغات جبال النوبة

*اذن هي اجنبية

*أيها الناس

*نظرة فاحصة لاطراف الحوار المصري سوداني

*تلقى القبلية والجهوية والعنصرية طاغية على الوجود

*وللاسف لايوجد من يتحاور حفاظا على مكتسبات قبيلته او جهته أو حتى حركته التي يمثلها

*اللعب كلو لصالح الورق مع تغطية الامر بعبارة اهلنا في دارفور واهلنا في شرق السودان

*واهلنا ديل لم يصبهم خير قبل هذا الحوار ولن يصبهم

*ولكن هذه التشكيلة التي تخوض الحوار

*للاسف تقدم دعوة صريحة للباقين على التمسك بالنعرات القبلية والجهوية والعنصرية

*لانو ماممكن يقعدوا يتفرجوا

*وينتظروا عقدوا ولا ماعقدوا

*لانو ماممكن يكون دورهم اطلاق الزغاريد لو قالوا ليهم عقدوا وانطلقت اصوات الكلاشات

*الباقين الزغرودة مابتشبههم ولكن الكلاش خايل جدا عليهم

*فلا تحملوا الناس على اشياء يتفادوها ليس خوفا ولا جبنا ولكنه التعقل لاجل الطموح في وطن خير ديمقراطي يسع الجميع ويتساوي فيه الناس باختلاف دياناتهم واعراقهم وجهوياتهم واثنياتهم

*هذا والا؟؟؟؟؟؟؟

*المهم

*ابقوا عشرة عشان مانبقي كتار

*امس صحيت من النوم قالوا لي شالوم

*قلت ليهم شالوم شالوم

*لكن البقرر شالوم ولا ماشالوم

*هو الاجلاس وهو اهم مطلوبات الكاف

*كراسي البرلمان لسة فاضية

*يبقي شالوم جات سابقة لأوانها

*أها

*نجي لي شمارات والي الخرتوم

*كان شفت يا والينا

*اسي مابنرد لو شالوم قالها لينا

*ده قرار شعب يا والينا

شمارات الكلب

ننساك كيف والكلب قال في مصر ودوكم فين؟؟؟؟؟ واستقبلكم ميييين؟؟؟؟

طب ليييييه؟؟؟

وإلى لقاء