شمارات.. سلك | محامي بينضرب يارجالة بالانجليزي

*تقول لي مافيا السجاير في البلد دي ماتعمل كده

*ليها حق تعمل أكتر من كده

*مدام محامي كبير محترم بينضرب على قفاه

*لأ…ووين الكلام ده؟

*داخل قاعة المحكمة

*أجي يا إخواني!

*والضربو منو؟

*اتنين من المنوط بهما حفظ الأمن وتوفير الأمان بالمحكمة

*سجمنا…. والقاضي وين؟

*قاااااعد وشايف وعارف وجوه القاعة

*فطر وصلى وعمل حاجاتو كلها

*ثم كان مسك الختام الفيلم الكبير بعنوان

*ياخراشي.. محامي بينضرب على قفاه بالمحكمة

*محكمة بالما؟؟؟

*وتقول لي مافيا السجاير ماتعمل كده!

*أين الإخوة الثوار الأحرار؟

*أين المحامون؟

*بل أين القضاء من كل ذلك؟؟؟

*وهل موقف اللجنة التسييرية كان كافياً كردة فعل علي بشاعة الفعل؟

*وهل عبر الإخوة المحامون بتلك الوقفة الاحتجاجية على طريقة ندين ونشجب؟؟؟

*موقف هزيل

*مع احترامي لأصحاب الموقف

*كان لابد وأن يخلع أي محامي تلك (الكرافتة) الأنيقة

*فلكل مقام مقال

*ومقام الاعتداء على الأستاذ المحترم مبارك الجنيد

*مقام المقال المناسب له لا يكون باللسان

*البلد دي فاتت الحد

*أمال بنلوم تسعة طويلة في شنو؟؟؟؟

*وبنلوم مافيا السجائر على شنو؟؟؟

*باختصار كده

*الناس ديل دايرين شنو؟

*دايرين يفهمونا شنو؟؟؟

*دايرين يصلوا لي شنو؟؟؟

*نحنا وصلنا الحد خلاص

*وتاني افتكر دور المدافع مابنفع

*خير وسيلة للدفاع الهجوم

*ماحانستعين بمحترفين أجانب

*ثقتنا في سودانويتنا كبيرة

*والتبقى تبقى

*تمطر دوم

*الشمس تطلع غرب

*النيل يرجع فكتوريا

*الحبش يلفوا النيل الأزرق

*القيامة تقوم

*مابهمنا

*التبقى تبقى

*يعني حاتبقى أكتر من البقت!!!!

*لحسن حظنا وسوء حظهم

*الأستاذ الكبير مبارك الجنيد لايحتاج لوصية

*منعول أبوك مافيا سجاير في البلد دي

*أها

*نجي لي شمارات والي الخرتوم

*كان شفت يا والينا

*في المحاكم بقوا يحقروا بينا

*تاني الفضل شنو يا والينا؟؟؟

شمارات الكلب

ننساك كيف والكلب قال انعم بطول سلامة يا مبارك… يادوبك الثورة بدت.. ففي تونس أشعلها كف على خد بائع موز وأنت بايع الدنيا ومشتري الوطن.

وإلى لقاء