شمارات.. سلك | مصر… سرطان السودان

*إذا رجعنا لاتفاقية السد العالي
*وواقع العمل بموجب تلك الاتفاقية
*نلقى السودان ضحى بحلفا الجميلة
*بالتاريخ والحاضر والمستقبل
*طيب ليه؟
*بالتأكيد لأننا ننظر إليها من منطلق
*مصر يا أخت بلادي ياشقيقة
*وهم ينظرون إلينا من زاوية البواب الجاهل البلبس ستة جلاليب مع بعض
*المغفل الذي لم يخلقه الله إلا لخدمة مصر
*يحشرون أنفهم فيما يلينا
*ولا نحشر أنفنا فيما يليهم
*لأننا نكتفي بحشر أنفنا في فارغة ومقدودة ونكتفي بذلك
*يحشرون أنفهم فيما يلينا
*ومابنقول ليهم سعيكم مشكور
*سكتنا على ذلك دهوراً
*نصدر لهم السمسم واللحوم والماشية والكركدي والتوابل ووووو
*ويصدرون لنا المشاكل والحلويات غير الصالحة للاستعمال الآدمي
*والفواكه المروية مما يخرجون
*فاصابونا في مقتل
*أصابونا في أطفالنا سرطانات
*يظهر مصر ضاقت عليهم
*ومحتاجين للسودان خلا يتمددوا فيهو
*إعدام الأطفال يقرب الحلم بجنوب وادي خالي من البشر
*ونحنا نستاهل
*لأننا نتهابل ولا (نتعامل) معهم بدونية لا أجد مبرراً لها
*يعني مشي الموضة وحتت اللون دي والكابريهات خلاس يعني شبعتنا؟؟؟
*أسي نحنا ماشين موضة وفاسخين وبنشرب شيشة بنين وبنات في الأماكن العامة
*تاني مصر لي شنو؟؟؟
*إذا جينا لحلايب وشلاتين
*طوالي بتذكر قصة الزول القالوا ليهو شنطتك وقعت من الطيارة
*قال مامشكلة المفتاح معاي
*أسي حلايب عندهم والمفتاح معانا
*نكتفي بذلك
*طالما الخرائط القديمة جابت حلايب جوه السودان
*يبقى المفتاح معانا
*ملف نديره بمنتهى العبط
*أيها الناس
*اختوا مصر
*اهبطوا مصر ده كان زمان
*اختوا مصر ليظل في سودان
*إذا كان لابد
*فمن أجل أبنائي
*شددوا على الجودة والمواصفات فيما يتعلق بالمستورد من مصر من حاجات بتتأكل
*خصوصاً ما يتعلق بالأطفال
*أدري جيداً أن بعض ضعاف النفوس عندنا تهمهم مصر أكتر من السودان
*وبحبو (ياكلوا) من مصر
*لكن ده ماعلى حساب أطفالنا
*زماااان
*آدم شو قلة أدبو علينا شديد
*عندو برنامج خصصو للتريقة على السودان أرضا والسودانيين رئيساً وشعباً
*لما رديت عليهو على صفحات صحيفة الهدف
*قامت الدنيا ولم تقعد
*سفيرهم احتج لدى وزارة الخارجية التي أبلغت بدورها (الجماعة) واستدعوني
*كنت قايلهم دايرين يكرموني
*ولكنها الدونية
*كان موقفهم خلاف ذلك
*سيبينا في حالنا يامصر
*ولا تلاتة بالله العظيم موش هايحصلك طيب
*أها
*نجي لي شمارات والي الخرتوم
*كان شفت يا والينا
*كان مافكينا درب مصر يا أخينا
*مابتقوم لينا قايمة تنمينا
شمارات الكلب
ننساك كيف والكلب قال تقوم ليكم قايمة؟؟؟ حاتقوم قيامتكم .
وإلى لقاء