شمارات.. يا مستورة وساترانا

*جانا الفلس

*أساساً هو ساكن معانا

*لكن اليومين دي متفرغ لينا

*والسترة غالبانا

*وجانا الشتاء

*جاب المستورة الساترانا

*بعضنا يطلق عليها اسم (بنضورة)

*والمصريين بسموها (أوطة)

*والاسم الشائع طماطم

*في ناس بقولوا طماطم حمراء

*التقول في طماطم زرقاء

*وفي طماطم أكل وطماطم ملاح

*طماطم الأكل بنطلقها على الطماطم التي تصلح في السلطة

*السلطة ذاتها بنسميها السلطة الخضراء

*التقول في سلطة صفراء

*المهم بنقول طماطم أكل

*التقول في طماطم شراب

*وفي طماطم ملاح

*ودي الطماطم (المخفجة)

*بتزبط الحلة صاح

*أساساً هي صلصة

*والصلصة ذاتها طماطم

*لكن طماطم الملاح في الملاح أطعم من الصلصة

*وعلى ذكر الصلصة

*أذكر ونحنا صغار

*في موسم الطماطم

*كنا بنمشي مع حبوباتنا السوق

*يشترن الطماطم بالقفة

*كذا قفة

*ويجن يصنعن منها أجود صلصة

*صلصة تتحدى كل الأنواع

*وتقعد سنة للحول

*لأنهن كانن بحفظنها في برطمانيات زجاجية ويصبن عليها في وشها بعض الزيت عشان ما (تصوفن)

*ويحكمن القفل

*ياحليل حبوباتنا

*كانن عبارة عن مصانع مواد غذائية

*المربة دي علي الطلاق بصنعنها في البيت

*ومربة القريب أقسم بالله من قشر القريب

*ويصنعن الصلصة

*وحبوبات اليوم الفلهمة كاتلاهن

*صوص وكاتشب

*ويضيعن موسم الطماطم العامر

*وفي كتير من أنحاء السودان

*تبدع النساء في صناعة الأمن الغذائي

*تخيلوا في دارفور عسل النبق بقعد سنة

*وعسل البطيخ بقعد سنة

*وبدون مواد حافظة وقوارير تعبئة معقمة

*إنه الإبداع الذي تركته الأسر السودانية بدواعي المدنية (والفلهمة) الفارغة

*فدولة تمتلك خيرات قدر خيراتنا دي تطرح نفسها في جميع المواسم

*وتمتلك مصانع مواد غذائية تحقق الأمن الغذائي قدر نسوان البلد دي (الما مفلهمات)

*حرام أن يتضور جوعاً فيها إنسان

*ونرجع للطماطم

*المستورة الساترانا

*مع هذا الركود والفلس

*مافي شي بسترنا غير الطماطم

*والله الوقفة البتقيفها معانا الطماطم

*أبهاتنا مابقيفوها معانا

*حيوا معي البنضورة المستورة

*أها

*نجي لي شمارات والي الخرتوم

*والينا المكلف علينا

*ماتسمع بنسواننا مصانع يحققن الأمن الغذائي لينا

*تقوم تفرض رسوم تجبرهن يقفلن مصانعن علينا

شمارات الكلب

ننساك كيف والكلب قال نحنا ذاتنا بقينا ناكل طماطم.

وإلى لقاء