شمارات.. سلك | فاطمة كباشي

بسم الله الرحمن الرحيم
*الليلة شمارنا حااااااار
*شمارنا عن لقاء في استطلاعات الجزيرة للجماهير بقطر
*الاستطلاع عن رأيك في مونديال قطر والتنظيم والاجواء
*يعني فتح المجال للاطراء علي قطر في تنظيمها لكأس العالم
*وقطر مامحتاجة
*فكلما قامت به في فعاليات كأس العالم كان ملفتا حد الادهاش
*ولكن هذا لايمنع شوية(كسير تلج)في مفهوم الجزيرة كقناة قطرية
*وشكارتها لازم تكون دلاكتها
*فهي تشهد علي روعة المنظر
*المهم
*من ضمن الاستطلاعات
*اطلت علينا فاطمة كباشي
*اعلامية سودانية بحسب التعريف
*فاطمة او فاطنة قالت رأيها
*قطر ابدعت
*في التنظيم والاخراج
*واضافت قائلة
*ونحنا كسودانيين بنشجع قطر عشان منتخبها معظمو سودانيين
*المذيع بلع ريقو
*والمايك قرب يفارق ايدو
*وتعليق فاطنة يحمد سيدو
*قامت الدنيا ولم تقعد
*كيييييف فاطنة تقول كلام زي ده
*وتحرج قطر
*كيييف ده يحصل
*وغالبية النقاد كانوا قطريون من حملة الجوازات السودانية
*باقي نحنا علاقتنا بالسودان اضحت مجرد جواز
*لكن الانتماء والغيرة والبسالة في الدفاع
*بتكون لاوطان تانية لانحمل جوازاتها
*ولكنا نحملها في القلوب

*معظم الناس غلطوا فاطنة
*وقالوا مابراها
*غلطانة ونص وخمسة
*احرجتنا وبقتنا قدر السمسمة مع قطر الحبيبة
*لانها جاءت بافك
*كيييف تقول منتخب قطر معظمو سودانيين؟
*اسي ده وقتو؟
*اسي ده في داعي ليهو؟
*وقالت اعلامية كمان
*وفي ناس قربوا يودوا قطر الدكتور
*يعملوا ليها فحوصات دقيقة
*عشان يتأكدوا انو كلام فاطنة ده ماسبب ليها شي
*ولامجرد خدش
*وفاطنة
*التصبر لي لما تجي راجعة
*ايها الناس
*هكذا كانت معظم الاراء حول مداخلة فاطنة
*اما انا
*فأري غير ذلك
*اري ان فاطنة كباشي بقت عندنا فاطنة السمحة
*لانها استغلت المنبر العالمي ونشرت حقيقة انو الموهبة السودانية برااااحة ممكن تلعب في كأس العالم اذا وجدت الرعاية والاهتمام
*فاطنة السمحة قلبها علي بلدها
*وغيرها قلبو علي جهات اخري(آوياني)
*شكرا فطومة
*وموقف الناس من مداخلتك
*ذكرني كاراكتير مصري
*حا احاول انقل صورتو بدقة
*مريضة صبية فتية جميلة ذات تضاريس وغنج شديد
*تجلس خلف الستارة علي الطاولة الطبية
*والطبيب يحمل حقنة
*الصبية:والنبي يا دكتور عشان خاطري اديهالي في دراعي
*الطبيب:وانا ماليش خاطر عندك!!!!!!!
*ياناس
*السودان ده مالوش خاطر عندكم؟؟؟؟
*ادوها ليهو في دراعو مرة واحدة بس
*بدل تختوها ليهو دايما بتلك القسوة
*ووطننا الباسمك كتبنا ورطنا
*ليست مثل
*وطننا الباسمك خنقنا وعفصنا
*وتحية لفاطنة كباشي السمحة
*سمحة الانتماء
*والبقية لاعزاء ايها الاعزاء
*والنبي في دراعي عشان خاطري لن ننساها ليكم

*اها
*نجي لي شمارات والي الخرتوم
*والينا
*كرموا فاطنة كيتا فينا
*عشان خاطر الوطن ياوالينا
شمارات الكلب
ننساك كيف والكلب قال في البرد ده كسير التلج كعب ياناس
والي لقاء
سلك