مدير الهيئة القومية للطرق والجسور ….. ياخ بالغت لكن !
بقلم/ صبري محمد علي (العيكورة)
اورد موقع (صوت السودان) الالكتروني بالامس نقلا عن صحيفة (السوداني) ان مدير الهيئة العامة للطرق والجسور السيد/ جعفر حسن آدم قلل من رفض غرفة النقل لزيادة رسوم العبور وان التحصيل يسير بصورة سلسة او طبيعية حقيقة غير متذكر المفردة بالضبط . وقال ان هناك فئة من اصحاب الشركات من غير ان يسميهم يملكون شركات نقل عملاقة هم من يحثون الغرفة على التصعيد ولم ينكر السيد المدير على اهمية التنسيق بين (شركاء الطريق) .
الموقع نقل عن السيد المدير قوله ان تكلفة تنفيذ (كيلومتر) الواحد من الاسفلت تبلغ (٦٠٠) الف دولار و ان اصلاح الحفرة تكلف (٣٠٠) دولار !
حسبوها كيفن وباى مرجعية و (إكويشن) علمي علمك يا (عب باسط)
ونقل عنه ايضا قوله إن فرض تلك الزيادة فى رسوم العبور الغرض منها هو توفير الموارد لصيانة الطرق !
اووول حاجة يا السيد المدير خليني اقول ليك ومن (منطلق) حلوه صاح؟
من منطلق خبرة فى مجال هندسة المواد لاكثر من ثلاثين عاما عاوزك تسمع كلامي ده كوييييس ….
حكاية (٦٠٠) الف دولار انا ما عاوز اقول ليك الكلام ده غلط واللا صاح لانك لم توضح العرض المسفلت من هذا الكيلو و عرض الاكتاف الترابية و وسماكة طبقات الاسفلت وهل هى واحدة واللا اتنين وهل (كيلو الهنا ده) فيهو طبقة (sub-base)واللا (aggregate base coarse)
وهل حا ترشوه بمادة ال (ام . سي . ون) واللا الحكاية ناشفة ساكت .
الكيلو ده فيهو دهانات وعيون قطط واللا اغبش ساي !
الكيلو ده عليهو لوحات ارشادية وتحذيرية واللا (مداقسه ساكت) فى حاجات كتيرة يا سعادتك المفروض تدرس قبل ما (ترمي لينا) الرقم ده .
قناعتي وحسب اسعار مادة (البيتومين) وتكلفة الانشاء ( الكيلو بتاعك ده) لو طار السماء لن يتجاوز ال (٢٠٠) الف دولار ده لو افترضنا ان العرض المسفلت (١٢) وكتاف ترابية مترين من كل جانب و ان هناك اعمال حفريات وعادة هى الاعلى سعرا
ولو افترضنا يا سعادتك ….
ان الكيلو ده طلع عروس عدييل يرقش ما بصل كلامك ده .
بعدين يا سعادة المدير (ياتو) حفرة البصلحوها ب (٣٠٠) دولار بتملوها عدس مثلا؟ ما لازم نعرف ابعاد وعمق الحفرة ! ونوع المواد وشنو يعني ما ياهو التراب والموية وشوية (compaction) وقريدر و اسفلت والسلام على طه الامام ! فى شنو تاني؟
(ده لو ما ارتكبتوا ام الكبائر وفردتو الاسفلت بالقريدر )
يا حليل درجة الحرارة !!
فحقو الكلام يكون معقول شوية وعلمي كمان وما يكون فيهو سواقة بالخلا الا اللهم إن كان(الفكي) مركب عودو معاكم فى الحكاية دى يبقى معليش .
السيد المدير …..
وقبل ما تقول لي (ورثنا وضع مأساوي من الكيزان) وكده اسمعني كويس فى الكلام الجايي ده!
الطرق مواد والمواد مختبر والمختبر مفقود فى السودان فكل الخلطات الخرصانية والاسفلتية يجب ان تصمم اولا وتجري عليها كل تجارب ضبط الجودة غير كده فيجب ان لا (تطلع الشارع) نهائيا
والحكاية دى ….
قد تاخذ اسابيع ولربما شهور (طيب ياسيدى) حا تقول لى (انتا) ما جايب خبر ! من وين يجيبوا ليك القروش يا استاذ صاح ؟
اكرى ليك ياسيدي المختبر ثم المختبر فالمختبر والحكاية دى لو (شبحتا) مدينة جدة السعودية القريبة دى واللا استعنت بعمنا (قوقل) ستجد الشركات المصنعة والموردة لهذه الاجهزة على قفا من يشيل و متوفره ومع التوصيل كمان .
قبل فترة كده (العبد لله) عملت دراسة لهذا الغرض وجدت ان تكلفة اجهزة المختبر الواحد لم تتجاوز ال (٧٠٠) الف ريال سعودي بما فيها اجهزة تصميم الاسفلت بتقانة (السوبر بيف) الاحدث فى العالم ! ياخى قول (تب) وصلت مليون او مليون نص ريال (انتا) عاوز ليك مختبر فى كل ولاية اذا عاوز تشتغل صاح يعني (١٣) مختبر !
ياخى امشي (للخال) متاكد لن يبخل على الوطن (بس وقعوا ليهو الكلام براااحه) و(حا) يديكم القروش صدقني .
لكن حكاية العواسة والرقيع وردم الحفر بالتراب والخرسانة لن تحل مشاكل الطرق فى السودان
والكفاءات الوطنية موجوووده لكن من اين للساسة بالمخ والتخطيط
قبل ما انسى : —-
اضر ما اصاب الطرق عبارة (الاسبوع الجاي عاوز اشوف الطريق ده مسفلت) ! واقل تجربة لضبط الجودة تحتاج ل (١٨) ساعة داخل الفرن ! فتأمل
(وبرضو يقولوا ليك البلد كلها بقت حفر) !
الثلاثاء ١١/ اكتوبر ٢٠٢٢م
