*** في مناطق الحروب تكون ( الأطراف الصناعية ) جزء من المطلوبات الإنسانية ولا أدري أي الجهات السودانية مطلوب منها بناء مصنع الأطراف الصناعية؟؟
*** لا العائدون من مصر أقنعوا القادمين من السودان بالبقاء ولا القادمين نصحوا العائدين بالرجوع
ولا زالت رحلة النزوح والعودة مستمرة
*** المريخ يلعب اليوم وتعادل السبت الفائت علّه يحوله انتصاراً والهلال الذي ( سوى ) الأحد الفائت ما سواه واثقين ( حيسوي الأحد ده ) أحسن منه ( ومدد يا القمة مدد )
*** كتبت وكتبت وسأكتب عن الأطفال فاقدي السند وآخر محطاتهم كانت كسلا فماذا عنهم السيد الوالي ماذا عن حالهم وأحوالهم
طمنا عليهم بارك الله فيك
*** ما عادت هي فحتى الألحان ( الفرحة ) التي كان يجودها عازف الكمان الماهر تحولت ( حزينة )
مات حذيفة فرج يرحمه الله وبكاه ( بكاءه ) وبكاؤه وكل الآلات الموسيقية والكمنجات ستبكي وتبكي ومالها من سكوت
*** لهيب الشوق اسم لمخبز سوداني بمنطقة عابدين وسط القاهرة استوقفني حسن اختيار الاسم ( بلهيب ) في الخبز ( ولهيب ) الشوق للوطن قسماً قسماً هذا ليس إعلان إنما وقفة مستحقة بالجمال أمام الجمال
*** هلالاب ومريخاب وكل ألوان اليوم غداً السبت حضوراً لتدشين كتاب الكابتن شوقي ببيت السودان والبيت بيت الجميع البيت يسع الجميع
*** تباشير امتحانات الشهادة السودانية ظهر وأولاد وبنات الحلة وأساتذتهم حولوا بيت عبدالماجد مدرسة يراجعوا ويذاكروا الليل والنهار يا شدرابي ود خيتي ست الجيل عليك الله انت والمعاك ادعوا ليهم وأخوانهم كلهم بالتوفيق والنجاح
واجب ده يا بت أحمد إن شاء الله ندعو ليهم اناء الليل وأطراف النهار
بت أحمد ربنا يحفظك ويملا جوفك صحة وعافية
*** كلما أردت الثناء على رئيس مجلس الهلال هشام السوباط ونائبه محمد ابراهيم العليقي وجميع أعضاء المجلس أقول ( أخليها شوية ) وكلما ( خليتها شوية ) تاني أخليها شوية عشان شنو عشان الأهلة ( طماعين ) طمعانين في المزيد والمزيد من الرجال ( الشالوا الشيلة )
*** السلاح في يد الجهلاء يعني المزيد من قتل الأبرياء
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً
جمعة مباركة وكل جمعة وانتو طيبين
عبدالمنعم شجرابي ..
