مما هو متداول اليوم عبر الوسائط التأكيد على حتمية زيارة رئيس مجلس السيادة لموسكو قريباً
نعم صحيح ….
(الكلام لافحو الهواء)
لكن …..
تجدني ميّال أن يكون صحيحاً من قرينتين إثنتين هُما
الأولى ….
(عمّنا) غالباً (بفهما) ليك بعد الساعة إطناشر فلربما إقتنع مؤخراً بأن التوجه بعلاقات السودان شرقاً قد أصبح فرض عين في ظل (كضب) الأمريكان والغرب علينا
وعجزهم في أن يقفوا موقفاً إيجابياً حول ما يدور في السودان إن لم يكُن مُحايداً
(تاني حاجة) …..
(كُراع البرهان التقيلة)
نعم (تقيييلة) وهذه من آفات إدارة الدولة
ولكن حسناً أن يتجِّة السودان ولو مُتأخراً نحو الشرق عموماً
روسيا ، الصين (مُش عارف) الهند
(فاااا) الناس ديل
آآي نعم (أولاد لزينا) لكن أرحم من الأمريكان
بلغفُوك ….
آآي بلغفوا حنانك زاتو
لكن ما بتدخلوا في قرارك الداخلي ولا سيادتك الوطنية
لكن تعال شوف الأمريكان والفرنسيبن والانجليز مثلاً
يحشر أنفه في أي حاجة وشايل (قزازتو) في جيبو وممكن جداً يسبقك على الجامع أو الكنيسة !!
فأعتقد (كثرة الشورة)
ما(كويسة)
فإذا عزمت فتوكل على الله
يجوا الروس
أيوه يجوا ياخ
إيه المُشكلة!
الدنيا مصالح (شوية) كيلو مترات علي الشاطي
هي الدُنيا طارت؟
مُقابل نفط وقمح وغاز و سلاح وعضلات
ومالو حلوين ياعم
عندنا أبنعوف
و نسمي
عثمانوف
و أيمنوف
أين المُشكلة؟
(حا) ينط ليك واحد يقول ليك يا أستاذ …
طيب و…..
(الروس رؤوس قد دنا عذابها)
نوديها وين
بسيطة ياعم نسمكرها
(الروس رؤوس قد دنا عناقُها)
أين المُشكلة ؟
فلماذا يظل السودان أسيراً لماضي من علاقات أضرت به كثيراً طالما أن الدبلوماسية هي (فن المُمْكِن)
وهاك دي على الطائر
الشمطاء خالتنا
(حاجة فرنسا)
عندها مُشكلة في الطاقة وخاصة أثناء فصل الشتاء ولكنها تُعتبر محلولة
أقول ليك كيفن ؟
تقوم (يا سِيِد اللمنتي ليك) بإستكياش بعض
(أولاد خالتنا) من دول الغرب الأفريقي
بالآتي …
تلمِّع ليها طالب أفريقي يدرس لديها من تلك الدول من النوع (أب رويساً خفيف داك)
يفسحوا له منابرهم للظهور
يرسلوا ليهو واحدة (نجفة) كده يعرسها
يرجعوه بلده (للكبرته) الأخيرة في خانة زعيم مُعارضة
يتم دعمه مادياً و إعلامياً سنة سنتين
(يفوروا ليك) الرئيس السابق بمسرحية إنتخابية مُضحكة ليصبح
(أخونا الكيشة)
هو الرئيس الجديد
وكل هذه الحسبة ربما لم تكلفهم مليون دولار
مُقابل ماذا ؟
مُقابل يورانيوم يولِّع فرنسا و يدفيها كلها دورة إنتخابية كاملة لربما أربع أو ثمان سنوات أو تزيد
شفتو الغباء الأفريقي كيف؟
الرُوس و الصينيين الكلام ده ما عندهم
(بزنس وفيفتي فيفتي)
وترمسة موية دافية !
والسلام على طه الإمام
بإختصار كده ….
المُعسكر الشرقي بيأكل معاك لكن المعسكر الغربي عاوز يأكلها كُلّها .
فخامة الرئيس ….
توكل على الله
و سخِّن طيارتك
وطُز في بايدين
وطُز في الكديس
الخميس ١٨/يوليو ٢٠٢٤م
