*** إمام الجمعة الذي يقرأ الخطبة من الورق لا وجود له والقيادي والزعيم الذي لا ( يقرأ ) ويصر على ( الارتجال ) عليه وزن حديثه وانتقاء كلماته فالكلمة ( طلقة ) قد تقيم الدنيا ولا تقعدها ويا هؤلاء ( اسكتوا ساكت ) فإن كان الحديث من فضة فالسكوت من ذهب
*** سألتني طفلتي يا ماما حنرجع السودان متين عشان انتي تمشي الشغل فكان رد الأم سألت نفسي يا ربي البت اشتاقت للسودان شديد ولا عملت ليها ( وجع وش؟ )
*** استدعيت مرة بجاهز الأمن والتهمة صحفي رياضي أكتب في السياسة قلت للمتحري أنا صحفي ( مرخص ) لم يكتب في ترخيصي تخصص معين أذكر الواقعة ( وما شاء الله ) عدد من الصحفيين الشباب أكدوا أن الصحفي ( صحفي ) يكتب في كل الاتجاهات يكتب بإحساس الناس ( ونبض الشارع )
*** المشكلة ليست في الزول البتكلم ( كلام الطير ) المشكلة في الناس البتصفق ( والمصيبة ) في الناس البتضحك في ( النكت البايخة )
*** تلاتة وعشرين من الجارات والحبيبات كن متفقات يمشن الحج تصدق مشن منهن اتنين بس ودعناهن ووصيناهن بالدعاء الحرب يا شدرابي ود خيتي ست الجيل قللت الناس المشت الحج الحرب كعبة كعبة
بت أحمد الأعمال بالنيات ربنا يتقبل منهن ومنكن بت أحمد ربنا يحفظك ويملا جوفك صحة وعافية
*** في الحكومة والأحزاب في الاتحادات والهيئات كتيرين الرابطين ( مكنة رئيس ) والحكاية كترت ولم يعد هناك ( مرؤوسين ) في وجود ( الرابطين مكنة رئيس )
*** لماذا كل اجتماعات الحكومة مع الأطراف التي تدعوها منقولة ( على الهواء مباشرة ؟؟) لماذا الكاميرات والمايكات؟ ومهندسو وعمال الصوت والصورة ؟؟ وأي مبرر لاجتماعات تطير ( محاضرها ) لمن يشاء ولا يشاء أوليس في هذا البلد ما يحتاج أن يبقى سراً ؟؟
اجيبوني بربكم يا عباد الله
*** القروبات الاجتماعية والثقافية قررت منع التناول السياسي والمصرون على كسر القرار بقوا ( والملتزمون ) غادروا وتركوا القروبات ( للامعات ) وأرباع السياسيين وبعض ( المتسيسين )
*** والأمنية والحلم دخلة بشارع الجامعة ورجعة بشارع الجمهورية ووقفة في ال13 وقدلة في خليفة وصابرين ومشية للمهداوي وعودة لمحطة سبعة والغالي وحجازي والملتقي والكيلو الأمنية والحلم بلادنا الحلوة نرجع ليها
( وقولوا آمين )
*** اللهم اعف عنا واغفر لنا وارحم والدينا وجميع موتانا واشف مرضانا وعاف مبتلانا واصلح حالنا وحال بلادنا وأعدنا إليها وأعدها إلينا آمنة مطمئنة جمعة مباركة وكل جمعة وانتو طيبين
عبدالمنعم شجرابي ..
