صبري محمد علي: الى حبايبنا القحاطة مع خالص التعازي

الى حبايبنا القحاطة مع خالص التعازي

بقلم/صبري محمد علي

خاص ب {صوت السودان}

حالة الذهول المسيطرة على (حبايبنا) القحاطة بمختلف ثيابهم التي يتبادلونها منذ البارحة
تجعلنا …
(نقوم بالواجب)
من مُنطلق وفي كُل كبدٍ رطبةٍ أجر
والواجب هو أن (نُوقِع ليهم)
ماذا تعني كلمة (إلتحام) التي حدثت بالأمس الجمعة بين جيش المهندسين وجيش كرري

وبما (إنو) من أم بارح هذا الموضوع (ماكل معاهم جمبة خااالس) ولم يستطيعوا إستيعاب و تصديق ما حدث وما سيحدث لجناحهم العسكري خلال المرحلة الثانية
والتي (أظنها) قد بدأت البارحة

فاااا الجماعة أي القحاطة منذ الأمس (عملوا سايرين) من قروباتهم و (تِممم) السكته الياها

تعرف يا (أبو القُحط) ….
الإلتحام هو أعلى درجة من (الكديب) وقبل ما تقول لي يا أستاذ قاصد شنو
أصبر لي جاي عليك في الكلام
حواشاتنا في الجزيرة في أي موسم زراعي ولأي محصول يتم نظافتها من الحشائش التي تنمو (متطفلةً) مع المحصول الأصلي واللي هو سيد الواطة !
يعني بالعربي كده ….
زي حكاية تكون قاعد في (بطن) بيتك في (امانتي الله) وفجأةً يدخلوا عليك دعامة يضايقوك في بيتك
فهمت عليّ …!
فما يفعله المزارعون هو النظافة أو ما تعرف إصطلاحاً ب (حش القش)
فااا(الحَشّة) الأولي
مسموح فيها أن لا تكون (١٠٠٪) يعني ما تستطيع نظافته (كتر خيرك)
حتى يصل الزرع مرحلة معينة من النمو
فهنا كان لأجدادنا إسم آخر للنظافة الاخيرة ويسمونها (حشة الكديب)
واللّه أصلها شنو ما تسألني
لكن هذه الحشّة
لو الله غضبان عليك أمشي خلي ليك قشة بي وراك
عليا النعمة ….
تنجلد لمن تأكل إيديك
وهذه تعني النظافة النهائية التى يجب أن تكون نسبة (القشجاويد) بي وراك (زيرو٪) بيرسنت
(فاااا) ….
بالضبط ده الحصل بالأمس جيش كرري شغال (كديب) وجيش المهندسين شغال (كديب) إتلاقوا في نقطة (زيرو جنجاويد)

أها ده ياهو الإلتحام الذي حدث البارحه بأم درمان .

طيب …
أصبر عليّ لسه ما كملت ليك …
بعد إكتمال هذه (النضافة) والكديب الماخمج
الباقي موضوع (السقاية) أو يُعرف ب
(مسك الموية)
و لان هذه المهمة ستأخذ وقت فتحتاج لموصفات خاصة من الصبر و تحمل السهر
وعِدة جاهزة
و زول بالو طويييل
فاااا سعادة الفريق أول ركن (غتاته) البرهان (حفظهو الله وأبغاهو)
ونكتبها بالغين والواو عمداً نكاية فيهم
فبالأمس جاب معاهو
سعادة الفريق أمن (غّمُتي) أحمد إبراهيم مُفضل عشان (يمسك الموية) وبكامل (عِدتُو وعَتادُو)

أظن كده يا حبايبي الحلوين فهمتو ماذا تعني كلمة (إلتحام)

والله المخارجة بي وين دي ما شغلتي
(مخير الله) …!