شمارات.. سلك | عاكسينا يا دنيا
*بالله الدنيا دي التقول خلقوها تعاكسنا بس
*ياخ تجيب العريضة ماتلقى النيابة
*تلقى النيابة العريضة تابه
*عكاس غريب
*تخت الشاي والببسي على التربيزة
*ناخد خمس دقائق
*الشاي يبرد والببسي يسخن
*ده عكاس شنو بس!
*تقنع الحرية التغيير تابه
*تقنع التغيير الحرية تابه
*نقبل بالعسكرية (اه وين يا) المدنية تفك ايدنا
*نقول مدنية العسكرية تبيدنا
*ده حظ شنو ده!
*الشقي بلقى العضم في الآيس كريم (ماتقروا الآيس بس وتعملوا رايحين)
*ونحنا لا لاقين عضم ولا لاقين آيس كريم ولا لاقين آيس (لا للمخدرات) والله كريم
*شكلة برهان وحميدتي دي بتذكرني بالشافع لما يبكي
*تقول ليهو مالك؟
*يقول ليك ماما دقتني
*تقوم تمسك يد ماما وتتظاهر بانك بتدق فيها
*تاني تدقي حمودي ده؟؟؟ تاني تدقي حمودي ده؟؟؟ تاني بكتلك كان دقيتي حمودي
*ماما بتكمل التمثيلية وتعمل فيها بتبكي
*وحمودي يضحك
*ويفتكر انو بابا دقى ليهو ماما عشان دقتو
*وبابا وماما سمن على عسل
*واحتمال كمان يجيبوا حمودي جديد يمثلوا عليهو
*المافي شنو والمعدوم شنو؟؟؟
*عكاس بس
*الدنيا تعاكس فينا
*ونحنا نضحك مع حمودي
*آل ايه
*ليه تدقي حمودي ده؟ تاني كان مرة اهبشيهو
*وعلى ذكر حمودي
*قالوا واحد جا خاشي البيت لقى مرتو بتدق في ولدو
*يامرا الولد ده الف مرة قلت ليك ماتدقيهو
*ده ولد
*الدق ده بطلعوا عديم شخصية وبخليهو يبقى جبان
*داقاهو مالو…عمل شنو؟؟؟
*المرة قالت: قليل أدب
*الابو قال ليها قليل أدب مالو عمل شنو؟؟؟
*المرة قالت: ولعت الحفرة مشيت أجيب البرش جيت لقيتو دفق لي الموية في الحفرة
*الأبو قال ليها أسي الله يسألك القليل أدب منو؟؟؟
*حمودي دايما مظلوم
*وعلى سياسيينا جميعاً وعسكريينا
*ان يعلموا جيدا
*حمدوي حايدفق الموية في الحفرة
*كلما ولعت الحفرة
*والماعاجبو يشوف ليهو حمام مغربي
*المستقبل مستقبل حمودي
*وعلى الكبار أن يعملوا لآخرتهم إن كانت تهمهم
*ولو ماهاماهم آخرتهم نحنا برضو ماهامينا البحصل ليهم هناك
*تظلمني في الدنيا
*في الآخرة يودوك الجنة يودوك النار مابخصني
*كل البخصني حقي في الدنيا
*أها
*نجي لي شمارات والي الخرتوم
*كان شفت يا والينا
*ناس حمودي قالوا لينا
*دخان حفرتكم ماهامينا
*وقطع رحطكم ماهامينا
*ونقش حنتكم ماهامينا
*ساونتنا كبيرة وبتكفينا
*ومن ساونتنا ما ملينا
شمارات الكلب
ننساك كيف والكلب قال جني وجن الراجل البرسلوهو يجيب الطلح.
وإلى لقاء
