شمارات.. سلك | هو الكلام بقروش؟؟؟؟

*الشي الوحيد أصوات شاهقة
الما بتدفعنا فيهو
الحكومة في السودان
قروش
*هو الكلام
*ولعل وزارة المالية
الآن تعكف على
تسعيرة حروف اللغة
وتقييم اللهجات
والرطانات لتسعيرها
*طبعا حايحاسبونا
بالسعر العالمي للحرف برغم
محلية لهجاتنا ورطاناتنا
*وفي الحالة دي الثرثارون
حايدفعوا كتير
*ولعلها فرصة نعلم بها
انفسنا ان لانحشر انوفنا
فيما لايخصنا
*لاقين الكلام المجاني ده
وواقعين ربربة
*الواحد يلقى شكلة في
الشارع
*يتدخل
*باركوها
*الحاصل شنو؟
*يلقي طرف الخيط ويلم
ليك في اطراف المشكلة
نقة يندمهم على المشكلة
العملوها
*نحنا لاقين الكلام المجاني
ده
*لذا تجدنا اكتر شعب
بتبرع بالمعلومة
*مثلا في احد أزقة القاهرة
لو سألت مصريا عن زول
*لو الزول واقف جمبو
حايقول ليك معرفوشي والله
*وفي احد ازقة الخرطوم
اذا سألت زول عن زول
*قبل مايجاوبك بجوا تلاتة
يقيفوا معاكم
*واديك سيناريو
*حسن: يا ابن العم بسأل
عن بيت عثمان طه
*محمد: قالوا ليك جمب
وين؟
*حسن: قالوا لي جمب
الجامع ده
*هنا يحضر النور وعطا
وسمير
*طوالي النور بتدخل (رغم
انو مافي زول سألو)
*النور: مرتو اسمها منو؟
*حسن: والله مابعرف اسم
مرتو
*عطا: شغال وين؟
*حسن: والله مابعرف…
انا داير اديهو أمانة مرسلنها
ليهو معاي؟؟؟
*سمير: عندهم كلب اسود
كدة؟؟؟
*حسن محتارا لايجاوب
*هنا يتدخل محمد:
عرفتو… طوييل كدة؟
*حسن: ايوة
*عطا: اخوهو كتلوهوا في
حفلة؟
*سمير: اختو ماقاعدة في
الواطة جلدوها ايام النظام
العام؟
*محمد: ابوهو تاجر بنقو
ومات في السجن؟
*حسن: ايوة
*الاربعة مع بعض: ياهو ده
بيتهم الجمبو السبيل ده
)* انتهي(
*تخيل كم معلومة تبرع بها
الناس ديل عن عثمان؟؟؟
*وده كلو لانو الكلام
مابقروش
*يعني حسن ده لو جا
يناسب ناس عثمان ديل بعد
المعلومات الاتبرع
بيها محمد وعطا
وسمير والنور
*بكون غير رأيو
وبكونوا السبب
الأساسي في زيادة
عدد عانسات الحلة
* با لمنا سبة
التبرع بالمعلومة
هو واحد من اهم اسباب
العنوسة والبورة في
السودان
*عشان كدة ياجبريل سعر
لينا الحروف خلينا ننطم
شوية
*هو الكلام لو بقروش
*برهان يقول بسلمها؟
*حميدتي يقول حايحارب
تهريب الدهب؟
*اردول يطالب بالعودة
لنظام خرج عليه هو معتصما
بالقصر؟؟؟
*وهو البقولوهوا الناس
شوية؟؟؟
*والسبب مجانية الكلام
العندنا دي
*سعر لينا الحروف
باجبريل وحول لينا مجانية
الكلام لمجانية التعليم او
مجانية العلاج
*فمن العار ان يقضي المرض
على اناس اميين جهلاء سنة
٢٠٢٣
*اها
*نجي لي شمارات والي
الخرتوم
*كان شفت يا والينا
*كان سعرتوا الكلام لينا
*اكتر ناس بدفعوا
البعطشوا الجيم يا والينا
شمارات الكلب
ننساك كيف والكلب قال
نحنا بدون تعطيش جيم
حايحاسبونا
والى لقاء