شمارات.. سلك | نكتة الموسم

*يقولون

*يقولون إن قحت تتوسط بين البرهان وحميدتي لرأب الصدع

*بعدما قالوا كده

*ضحكت لما اتشنقلت واتفنقلت على قفاي

*إنها نكتة الموسم

*وإن كانت أدبياً مسروقة من نكتة الكديس المشى يعزي الفار في وفاة أبو الفار

*قالوا الكديس مشى العزا

*ورفع الفاتحة

*الفار وقف بعيييد ورفع الفاتحة

*الكديس قال ليهو تعال قريب نبكي الحبيب

*الفار قال ليهو هنا كفانا والعبرة خانقانا

*فهل تستطيع قحت أنها تجي قريب لتبكي الحبيب (الوطن)

*ولا قحت العبرة خانقاها وبتقعد في محلها؟؟؟؟

*حاولي قربي ياقحت قريب وابكي الحبيب

*عشان من القلدة الأولى تعرفي حاجة ونبكيك انتي والحبيب

*قلدة أبو كديس

*إنه زمن النكات

*وشر البلية مايضحك

*المهم

*واحد مشى لي واحد قال ليهو ديني عشرة آلاف

*التاني قال ليهو ماعندي.. لكن عندي عشرين عند حسن… أمشي شيلها… شيل عشرة وجيب لي عشرة

*صاحبنا مشى لي حسن قال ليهو فلان داير منك كم،

*حسن قال ليهو داير مني عشرين

*قال ليهو ياحسن جيب عشرة واكتب ايصال بعد سنة بالعشرة التانية

*وقد كان

*وصاحبنا رجع لي سيد الدين

*قال ليهو يا الله يا الله حسن أداني عشرتي وكتب ليك عشرتك بعد سنة

*القصة دي ياها قصة قحت معانا

*شالت عشرتها كااااااش

*وجابت للثوار عشرتهم في مكتوب بعد سنة

*وحلك بعد سنة

*يامات الأمير

*يامات البعير

*يا ماتت الثورة واتشتت الثوار

*لذا

*على الإخوة الثوار الأحرار أن يذهبوا لحسن براااهم ويشيلوا حقهم بايدهم

*لانو قحت يا الله يا الله بتمرق بحقها وحقكم بمرق بقد القفة

*وياحليل القفة

*وياحليل المخلايا

*ويا حليل الأكياس الكتااااار

*وياحليل الرجال

*البفتحوا باب الشارع بكراعهم

*لأنو ايدينهم شايلة أرتال من الأكياس

*أها

*نجي لي شمارات والي الخرتوم

*كان شفت يا والينا

*بدت مدينتنا طريق العودة للقرية أم فانوس ورتينة

*وانتوا ماهاميكم ترييف المدينة

*ولا هاميكم الحزن الفينا

*وبعد ريفتوا المدينة ماهماكم دمعة الريف الحزينة

*حتى الريف كان جمييل يا والينا

*بس ربنا مبتلينا

شمارات الكلب

ننساك كيف والكلب قال ياحليل القرية والمدينة والسكة الحديد الكانت بتجيبنا وبتودينا

وإلى لقاء

 

#شمارات#سلك