شمارات.. سلك | نبني شنو؟؟؟؟

*كل الناس بتتكلم عن ضرورة بناء الدولة

*الدولة السودانية

*وكلو زول ليهو وجهة نظر حول نبدأ نبني من وين

*البعض يرى أن إعادة تأهيل ما أبادته الإنقاذ قصداً هو مقصد بداية بناء الدولة السودانية (ياحليها)

*الدولة ما الإنقاذ

*أصحاب الرأي ده قالوا

*اقتصاد السودان كان يقوم على سكك حديدية تصل من مناطق الإنتاج وحتى ميناء التصدير

*تقدر بآلاف الكيلومترات

*وكان يقوم على نقل نهري يسهل عملية نقل السلع داخلياً وإيجاد فرص تسويقها دون تكلفة نقل تذكر

*وكان يقوم على ناقل جوي اسمو سودانير (ياحليل هيثرو)

*وكان يقوم على إنتاج الجزيرة من قطن وقمح وتمني

*حتى عملنا شركة الأقطان

*وكان يقوم على الصمغ العربي

*وإنتاجنا منو نحنا بس أضعاف أضعاف إنتاج العالم كلو

*عشان كده أمريكا لما عاقبت الإنقاذ لم تشمل العقوبات الصمغ العربي (وناس الإنقاذ دقسوا)

*كان عليهم الربط بين تصدير الصمغ وبقية المنتجات

*ومقايضة الصمغ بالآليات التي تحتاجها البلد في الإنتاج

*لكن يخيل لي انو دقستهم كانت فوق راي

*إنتاج شنو ودولة منو الكانت بتفكر فيها وتهدف ليها الإنقاذ؟؟؟

*وكان اقتصاد السودان يقوم على تصدير اللحوم والماشية (الإناث)

*وفي عهد الإنقاذ تم تصدير إناث الماشية وإناث الناس ذاتو

*وكان اقتصاد السودان يقوم على خطوط بحرية تجوب العالم متبخترة تقدل فوق عديلها (الله يرحمها)

*وكان اقتصاد السودان يقوم على النقل المكنيكي الذي يشرف ويحدد أنواع السيارات والآليات ويصينها ويحدد صلاحيتها من تلجينها

*قتلته الإنقاذ ليقوم كلو وزير بالاستيراد على كيفو

*وتقوم لجانو بتلجين عربات جديدة تمهيداً لتمليكها لي ناس كده بأبخس الأثمان ويدفع الفرق الوطن

*وكان اقتصاد السودان يقوم على أشياء كلها دكتها الإنقاذ عنوة وعنية

*لذا يرى أصحاب هذا الرأي أن إعادة البناء تبدأ من تأهيل مادمرته الإنقاذ

*وفي رأي تاني بشوف انو بناء هذا البلد مستحيل لأنها تقبع على أرض تحمل في طياتها زلازل الخلاف وبراكين الاختلاف إلى يوم يبعثون

*الآراء كتيرة

*وأنا ذاتي عندي رأي

*أهم مقومات التنمية المستدامة هو التعليم

*أهم عناصر الإنتاج هو الإنسان

*أكثر الاستثمارات تحقيقاً لأرباح هي الاستثمار في الإنسان

*إذن نبدأ نبني في السطور التلاتة دي

*ونستصحب معنا تجربة ماليزيا وقصة اليابان البتتكون من جزر بدون موارد

*وتسامح أهل رواندا

*أها

*نجي لي شمارات والي الخرتوم

*قالوا لينا يا والينا

*إنك أمس مع السيادة مشروع نظافة الخرطوم دشنتوهوا لينا

*أها نضفنا الأربعاء باقي الأسبوع منو البنضف لينا؟؟؟

*النضافة سلوك ماحملات يا والينا

*والسلوك بتعلمو الحكومات لشعوبها بالتوعية وبرادع قوانينا

شمارات الكلب

ننساك كيف والكلب قال عربية النفايات بضحكني لما تجي تلقط الأكياس بعد ننفضها نحنا والشماسة ثم تقوم بنشرها من جديد على الشوارع المجاورة في رحلتها للمكب….مكب بالما؟؟؟

وإلى لقاء