شمارات.. سلك | يلاَّ يا أولاد المدارس
*قول ربك رب الخير جاب لينا وزير مالية مؤمن بدور العلم في التنمية
*ومؤمن بقدسية المعلم ورسالية مهنة التعليم
*أمو غنت مع بنات جيلها
*يا الماشي لي باريس جيب لي معاك عريس
*شرطاً يكون لبيس من هيئة التدريس
*عزيزي المستمع
*تأمل عبارة شرطاً يكون لبيس
*ومن وين؟
*من هيئة التدريس
*تخيل عزيزي المشاهد
*المعلم في البلد دي كان محترم قدر شنو!
*وكان ياماكان
*في قديم الزمان
*وطن اسمو السودان
*المهم
*قول ربك رب الخير جاب لينا وزير مالية بالمواصفات دي
*وقام السيد وزير ماليتنا صاحب المواصفات دي حلحل مشاكل المعلمين
*وقيمهم
*وأداهم حقوقهم خصماً على بند البمبان
*ونزل المطر ونزل المعلمون المدارس
*هل في زمن للعام الدراسي الراح قوة راس؟؟؟
*أم سيجمدون العام الدراسي احتساباً؟؟؟
*وهل تعرف حكومتنا (إن وجدت)
*أن التلاميذ كانوا يردون نشيد (قم للمعلم) بكل نشاط وحيوية وقناعة؟؟؟
*طيب ليه حكومتنا ماقامت للمعلم ولم تفه الحد الأدنى من حقوقه؟؟؟
*هل لأنها تؤمن بدور من يحمل البندقية والبمبان أكتر من إيمانها بدور من يحمل طباشيرة وطموح وحلم وحالنا يوم باكر؟؟؟؟
*إذا عملت الحكومة بمقولة أي سونكي لازم يبقى مسطرينة
*كان الاحترام ساد الجميع
*من يحمل بندقية ومن يحمل طباشيرة
*فلكل واحد فيهما دور رسالي إن وجه مايحمله لما حمله من أجله
*أيها الناس
*تفتكروا ربنا بدينا وزير مالية زي ده؟؟؟
*وزير مالية أول تصريح ليهو يكون
*يلا يا أولاد المدارس
*المهم
*لازالت البواعيض بكل موديلاتها حايمة فينا
*والحيكومة ولا كأنها هنا
*ولو دايرين الحكومة تتعامل مع أرتال البعوض بجد واجتهاد واهتمام
*لازم نقنع الحكومة انو البعوض ده من الثوار
*إذا اقتنعت
*صدقوني
*من بكرة قصاد كل بعوضة حايكون في تاتشر
*يا البرهان
*البعوض الثائر ده ماتخلوهوا
*كلموا جبريل يخصص ليهو من الميزانية مبلغ إبادة مقدر
*ويعمل لينا رسم
*يسميهو رسوم بعوض بأنواعه المختلفة
*بندفع
*بس حمى الوادي دي مابنقدر عليها
*وكان ماغطت
*بيعوا ماتبقى من الوطن لإبادة البعوض
*الوطن بي ناسو بتباع ليكم أغلى من الوطن بي بواعيضو وبدون ناسو
*أها
*نجي لي شمارات والي الخرتوم
*كان شفت يا والينا
*باعوضكم المربنو لينا
*مدرب كمان يا والينا
*اتنين يرفعن البطانية والتالتة تختها لينا
شمارات الكلب
ننساك كيف والكلب قال في باعوض قناص من بعيييد بختها ليك ويطبق بندقيتو ويكسح.
وإلى لقاء
