شمارات.. سلك | الفسبكة والبرنجي أب اصبع

*بدينا سلسلة تعقب مافيا السجاير
*خطيييييرة
*التفاصيل مذهلة
*وتفاصيل التفاصيل تجنن
*وتلاتة عتاولة يقودون المافيا
*بالتعاون مع بعض آخر يفترض فيه محاربة تلك المافيا
*وقفات احتجاجية كانت هناك
*تدين وتستنكر وتشجب
*سنعود
*المهم
*في حاجات في البلد دي غريبة
*مثلا انا سلك ده
*قول (لاقدر الله) عندي مصنع صابون
*قمت جبت لي زول يلقط لي دولار من السوق (بي حقو)
*اقوم بعد حين اصنع منه محتكرا لكل او جل انتاج المصنع من الصابون لانو صفتو تغيرت من وسيط دولار لمشتري للمنتج ويبقى محتكر يكسر رقاب المستهلكين ويكسب اكتر مما اكسب انا سيد المصنع؟؟؟؟
*ده كلام غريب
*قول جاني زول اشترى دلالة المصنع من عربات وآليات وغيرو
*طوااالي ادخلو محتكر لصابون الشعب؟؟؟
*ولاحظ مصنعي ده ماساهل
*مصنع الحكومة بترضع منو ضرائب ورسوم انتاج
*اكتر مما ترضعه حكومة السعودية من حقول البترول الفيها
*وعشان كدا الحكومة تقوم تقفل بالضبة والمفتاح على كل الحدود مانعة ولوج (صابون) للبلد دي حماية لمصنعي الوطني.
*تلك الحماية هي في الاساس ليست للصناعة الوطنية بقدرما هي حماية للاحتكارية الثلاثية تلك.
*غايتو يا الصابون بقيت (ترغي) لي ناس وناس رغوة مابشموها..
*ماعلينا
*اسي الجاب الصابون شنو؟؟؟
*حانعود لتلك المافيا
*فالشعب ضحية
*ولازم يعرف التفاصيل
*عشان نطلق عليهو
*الشعب الشاهد والضحية
*المهم
*هذا الشعب مبدع
*والناس البتفسبك بانتظام ممكن تكون عارفه كدة
*وهي ذاتها جزء من ذلك الابداع
*واحدة كاتبة
*يا اخواني زول يكلم امي يقول ليها القرع ده حقنوهو بالآيس
*وواحد داهية
*كتب بمنتهى الذكاء عن حال اقل مايوصف به عشرين مجلد
*اختصرهم في تلاتة سطور
*قال انا ساكن جبرة جمبي مسؤول حكومي
*المسؤول ده يومي بضبح خروف
*وكان ماضبح بضبح خروفين
*قام كلبي بقي يومي يمشي يقعد جمب بيت ناس المسؤول
*قلت خليهو يسترزق
*بقي مرات مابرجع
*قلت مامشكلة
*لكن الغاظني
*يوم جيت ماري جمب بيت ذلك المسؤول كلبي نبح فيني!!
*نحنا وقفنا وين في موضوع مافيا السجاير؟؟؟
*اخير نجي لي شمارات والي الخرتوم
*كان شفت يا والينا
*مصنعي بتاع الصابون الفوق داك يا اخينا
*كان لقيت لي محتكرين ورينا
شمارات الكلب
ننساك كيف والكلب قال الصابون لو مادارك في الضلام مابرغي ليك
وإلى لقاء