مصنع (عدييل) يا سهير..!
مصنع (عدييل) يا سهير ..!
بقلم/صبري محمد علي (العيكورة)
خاص ب [صوت السودان]
وصلتني رسالة واتساب من الاستاذة سهير عبد الرحيم عبارة عن رابط بصحيفة (صوت السودان) المملوكة لها يقول عنوان الرابط
عااااجل …
(ضبط مصنع لتصنيع المخدرات)
ياساتر
واتبعت سهير رسالتها بتعلق وضعته بين قوسين موجه لي
(قال ليك مصنع عديييل) !
ونحن اول انفرد بنشر الخبر
فى (الوكت داك كلامها صحيح) لكن بعد دقائق معدودة
تفشى الخبر ..
طيب قبل ان نعلق على مضمون الخبر يجب ان نحيي عاليا شرطة مكافحة المخدرات و وحدة المكافحة بجهاز المخابرات العامة على هذا الانجاز والاعجاز فى ظل دولة اقل ما توصف بانها غير موجودة الا بشارع القصر و (إمكن) شارع الستين بالخرطوم
الخبر الصاعق يقول …
إن الاجهزة الامنية المذكورة تمكنت و وفقا لمعلومات دقيقة من ضبط مصنع لصناعة المصيبة الاسمها حبوب (الكبتاجون) بعد عبوره الحدود الشرقية
وان ارضية هذا المصنع كانت معدة وجاهزة لتركيبة
وافادت مصادر (لناس سهير)
ان انتاجية التصميمية لهذا المصنع تتجاوز العشرة الف حبة فى اليوم الواحد وانه اوتي به لتغطية الاستهلاك المحلي (خلي بالك معاي) و سيصدر الفائض للخارج …!!!
وان المشتركين فى هذه (العملة السودة) سودانيين واجانب دون الافصاح عن جنسياتهم .
ياسلاااااام …
مصنع .. مصنع عديل يا جماعة و(بى قوة عين) كمان يقول ليك(لتغطية الاستهلاك المحلي والتصدير) !
عشرة آلاف حبة فى اليوم …
اتخيلوا يا مؤمنين لو اشتغل هذا المصنع ! هل سيفضل بالسودان (زول او زولة) صاحيين ! وهل سيكون هناك انسان منتج؟
ياخ انتاج شنو هو (حا) يكون فى كرعين يشيلن الناس ؟
وشوف بالله …
التجار اولاد اللزينا ديل الخسارة المعروفة فى هذه المهنة ما دايرنها
قال ليك (ياولد) …
بدل المساككة و مش عارف ارسالية قبضوها وارسالية مرت وكده ياخ خلينا نصنعوا ليهم فى (بطن بيتهم) وفى بلدهم النجيلة دي ونرتاح من الجري واللفيت ده! وخليهم يتكابسوا في الخرطوم حول الكراسي والاطاري والجن الاحمر .
مش دى نتيجة طبيعية لغباءنا ؟
حقيقة وبقدر سعادتي بهذا الحدث و هذا الانجاز الامني
وبرغم ان قلمي لم يطاوعني الانتظار حتى نستمع للقول من (خشم سيدو) ضمن المؤتمر الصحفي المتوقع .
برغم هذه النشوة …
الا ان غصة فى الحلق نعالجها مع الحروف …
مصنع … مصنع مخدرات يا عاام يختار السودان مقرا له؟
اين رجال السودان ياهؤلاء؟
اين السطوه والسلطة والبطشة اين الغيرة على حرمة عقول ابنائنا وبناتنا من مثل هؤلاء المجرمين .
حقيقة لرب ضارة نافعة
فعسى ان تحيي فينا موات النفوس والاستسلام للقدر اللعين فافيقوا يا شعب السودان هبة واحده اقتلعوا هذا الداء العضال من وطنكم .
وللفريق البرهان اقول …
حسنا التفت لهذا الملف ولو متأخرا ولكن كما (غردت) الاستاذة سهير قبل ايام تقول لكم لا فائدة من تشكيل اللجان و الهيئات لمكافحة هذا الداء وقالت لكم …..
(الدرب بى جاي)
وتعني به جهاز المخارات
وها هي وحدة المكافحة بالجهاز قد فعلتها
فاطلقوا يدها الباطشة وسترون مايسركم ويسر شعب السودان .
اما المجرمون فلا نرى لهم سوي ان يقتلوا او يصلبوا او ينفوا من ارض السودان .
قبل ما انسي :
انتو متخيلين معاي …
ده مصنع ده ما مصنع صلصة ياعااالم ده مصنع مخدرااااات كان سيستهدف ابنائكم وبناتهم
(حسبنا الله ونعم الوكيل)
بلد نجيلة ياخ …..!
