شمارات | تسييس الرياضة وترييض السياسة

*طبعاً تسييس الرياضة بوديها الخور

*والدليل (آلولي)

*الدليل نحنا ديل

*عاين لموقعنا

*حاتلقانا جوه الخور من زمنا بدري

*وتسييس الرياضة ليس إلا فسخ وجلخ يشوه الحقيقة ويظهر صورة كاذبة آخرها مرض عضال

*وقصة أننا سيسنا الرياضة دي لاينكرها إلا الذين سيسوها

*والذين استفادوا من تسييسها

*وأمامكم ألمانيا

*مايكل بلاك قال الاتحاد الألماني ترك الكرة وركز مع مواضيع لاعلاقة لها بالكرة أو بالرجولة

*عشان كده فقدت ألمانيا احترام الناس

*وفقدت التركيز في البطولة

*وفقدت التأهل

*ومشت عمان لتستغل طيارتها المكتوب عليها (منزل أحرار)

*ومعلقة (بيرق) المثليين الله لاعادهم

*أما ترييض السياسة

*فبودي البلد الآخرة

*وهاهي السياسة عندنا تعاني الترييض

*تمريرات لبعض بين اللاعبين

*وتمريرات قصيرة من لاعب غتيت بقصد إصابة زميل منافسو على الخانة

*ومرات تطفيش وتشتيت كورة

*ومرات تواطؤ وإضاعة ضربات جزاء تواطؤاً مع الخصم

*وبيع مباريات

*وده برضو عندنا

*عشان كده حقو نبطل تسييس رياضتنا وترييض سياستنا لنلحق بركب الدول

*دول خلقوها بعدنا فاتتنا

*ونحنا قاعدين للغلاط والاختلاف

*الوطن آخر من يطرق باب ذاكرتنا

*فهي مشغولة بشغف خلف المصالح الشخصية

*أقولها لكم

*لن نتفق

*لن نصل لاتفاق

*لأننا جبلنا على الخلاف والاختلاف

*ولأن أرضية الوطن الواسعة

*لم نعودها أن تشيل اتنين

*وصلنا لدرجة أن المسؤول يخدم قضيته الشخصية

*ثم القبلية

*ثم الجهوية

*ولايتم ذلك إلا بالتضييق على الآخر

*والآخر ده برضو زول من أهل الوطن

*وياحليلك يا وطننا

*نتلاقى في الجنة

*ده لو فينا زول دخل الجنة

*نسمع بالحرية والتغيير

*ونسمع بالجيش

*ونسمع بهيبة الدولة

*ولانعيش حرية ولم نشهد تغيير

*ونسأل ياتو جيش؟

*ياتو في الأجياش؟؟؟

*أما الهيبة

*فنجدها في الأغاني هيبة و(جبرة) يابرهان

*ونبحث عن الدولة

*نبحث عنها بشدة

*وشدة وتزول

*أها

*نجي لي شمارات والي الخرتوم

*كان شفت يا والينا

*خايفينك تصحى ماتلقى واحد فينا

شمارات الكلب

ننساك كيف والكلب قال ترييض السياسة أقصر الطرق ليهو (تريييل) الشعب .

وإلى لقاء