شمارات.. سلك | الاعدام حته حته

بسم الله الرحمن الرحيم
*لعلنا نعيش بشاعة في اي شي
*اسعار بشعة
*رسوم دراسية بشعة
*اجرة بشعة
*حالة شلش وبشعة
*حتي الجريمة اضحت بشعة
*نعم
*الجريمة بقت بشعة
*لأنو الجريمة ذاتها كانت حنينة
*والحرامية لي وكت قريب كانوا اولاد حلال(الا المختلسين)
*حرامي ود حلال يسرق موبايلك
*يخت ليك الشرائح جمبك
*دي ماسرقة بي ادب؟؟؟
*حرامي ود حلال وامو داعية ليهو
*ينشل جزلانك
*يشيل القروش ويرمي ليك الجزلان بي بطاقاتو ورخصو جوار مركز الشرطة
*دي ما سرقة بأمانة وشرف ؟؟؟؟
*الحرامية كانوا اولاد ناس ومتربين
*لكن في زمن البشاعة ده
*أصبحت الجريمة بشعة
*بشعة جدا
*تسعة طويلة ممكن يديك ساطور عشان تلفون ربيكة
*يعني قبل مايكتلك مفروض يتأكد
*هل لديك غنيمة تستدعي قتلك؟؟؟
*يقتلك اول بعدين يفتشك
*جس بعد الضبح
*وممكن يلقاك شلن ماعندك
*دي البشاعة ذاتها الدخلت علي الجريمة المهذبة بتاعتنا
*ياخ زمان قال ليك حرامي نطه في بيت لقي سيدو نايم في عنقريب مقطع وبدون مرتبة ومعلق جلابيتو
*فتشها لقاها مليمة مافيها
*خت ليهو مصاريف في جيب الجلابية ونطه اتخارج
*حرامية كانوا اولاد ناس
*حتي قصص الحرامية كانت نكات يتداولها الناس بكل صفاء نيه
*زي قصة الحرامي النطه في بيت فيهو سبعة اخوان صحابة بس
*الواحد لو وقف طولو تقيل في ضلو
*ونايمين بالشورتات في الحوش
*الحرامي براااحة دخل الغرفة
*شعر الدنيا علي الضلام العليها ضلمت تاني
*اتلفت لقي الحاجة والدة الصحابة ديل واقفة في الباب
*مرة قدر الجبل
*شبعاااانة
*الدنيا كانت بخيرها
*قالت للحرامي اجيك انا ولا اصحي ليك ديل
*واشرت علي الحوش من خلال الشباك
*الحرامي عاين لقي ليك سبعة سفن راقدات
*قال في سرو ياربي انا نطيت في فرن ولاشنو
*عتاولة عتاولة
*واحد جادع ايدو بره السرير
*الحرامي كان قايلها مرق سقف
*الحاجة رددت كلامها
*اجيك انا ولا اصحي ليك ديل
*الحرامي عاين ليهم تاني
*وعاين للحاجة
*الامية الكبيرة
*وبحث عن التخفيف
*قال ليها صحي لي ديل
*اخف وطأة
*ياخ في مصر القريبة دي
*الحرامية يخططوا لسرقة فيلا
*ساعة الصفر يتلاقوا جوار الفيلا
*يراجعوا الخطة تمام
*كبيرهم يقول ليهم
*يلا علي بركة الله….(ربونا يوفأنا يارجالة)
*حرامية بخافوا الله وبسموا قبل مايسرقوا
*ايها الناس
*الآن ارتبطت كل الجرائم بالبشاعة
*ولامفر من سن قوانين العقوبات فيها بشعة لكل من يرتكب جريمة بشعة
*زي جريمة بري الاخيرة دي
*مهما كان الجاني
*لاعقاب يناسب الجرم
*سوي الاعدام حته حته
*كلو يوم يعدموا حته ويقطعوا حته
*لما يجوا يدفنوهوا يدفنوهوا (ربيت )
*والكان الجاني اصفر شوية
*يدفنوهوا شاورما
*معقولة جريمة بهذه البشاعة يرتكبها انسان بشر ابن آدم؟؟؟؟؟؟؟؟؟؟
*اها
*نجي لي شمارات والي الخرتوم
*كان شفت يا والينا
*ماتستبعد لو يوم جيت ماري بالشارع قدامك سارينا
*لقيتنا معلقين وبسلخوا فينا
شمارات الكلب
ننساك كيف والكلب قال تتذكروا نكتة الحرامية الدخلوا البيت لقوا الراجل ومرتو والعتوت؟؟؟ لما الراجل قال لي مرتو كوركي الحرامي وقالت ليهو اصبر ….أها يا المسؤولين انتوا صابرين فوق راي نحنا وعتوتنا ده البصبرنا شنو؟؟؟؟
والي لقاء
سلك