اضرب واهرب.. شجرابي | عيد الحصاد

 ضبط المواد الغذائية الفاسدة ( جريمتان ) الجريمة الأولى أنها ( خزنت ) لسبب ما إلى انتهاء تاريخ صلاحيتها .. وثانياً ( عرضت ) على المستهلك فاسدة وضررها على صحة الإنسان أكبر من نفعها ( وبرحمة ) من القانون يواصل الفاسدون المفسدون بيعها
* يغادر إليها اليوم وبكل روعة ( عيد الحصاد ) تستقبل القضارف الهلال كما اعتادت بكرنفالات ومهرجانات ولا دهشة ( فالمدينة الخضراء ) دائرة من ( الدوائر الزرقاء ) وفي عيد الحصاد يغادر الهلال ( لحصد النقاط )
* بعد شد وجذب .. بعد تمدد وانكماش .. بعد خلاف داخله خلاف .. يبدأ المريخ مرحلة جديدة بأمل أن يكون صندوق الانتخابات ( أعدل ما صنع الإنسان ) جب ما قبله
* كباتن الهلال بشة والشغيل حصلا على ( الرخصة B الآسيوية ) مبروك نقولها للرخصة والشغيل وبشة يدخلان عبرها للتدريب مدربان مؤهلان
* الزول ده وقفتو ياها وقفتو .. الزول ده بلا جديد في ( فكرتو ونظرتو ) .. الزول ده بتكلم ( بنفس اللسان ) .. الزول ده ما زول
* أكثر من خمسين جلسة على إمتداد ثلاث سنوات قضاها رئيس المريخ الأسبق محمد الشيخ مدني بالمحاكم حكمت المحكمة ببرائته في شيك يخص المريخ والقضية نموذج لما يعانيه الإداريون من أنصار يوهمون الناس أنهم ( أهل البيت ) وأسياد الكلمة
* لا أدري أيهم أكبر عدداً الفنانين الشباب أم المترشحون لعضوية مجلس المريخ؟؟
* حي العرب والأمل العطبراوي لقاء من نار وغير مهم أن يكون اللقاء ببورتسودان فالأمل اعتاد العودة بالنقاط من خارج أرضه ( من زمااان ) وعطبراوي وأفتخر
* سألته عن اسم محافظ الخرطوم ( أجابني ما هو عارف )
وعن اسم والي الخرطوم ( أجابني ما هو عارف ) ولأنه يعمل بالتربية والتعليم سألته عن اسم الوزير ( أجابني ما هو عارف ) ..
ويا حليل زمن كان المواطن يعرف كل صغيرة وكبيرة عن المسؤول الصغير والكبير
* ( مشكلتها مشكلة ) إن واجهها الهلال باللاعبين الوطنيين ( ومشكلتها مشكلة ) إن واجهها الهلال بالمحترفين الأجانب ومشكلتها أكبر لو واجهها الهلال ( بخلطة ) من الأجانب والوطنيين مشكلة الشرطة أنها ستواجه الأسياد
عبدالمنعم شجرابي ..