العيكورة: قبل لقاء (ود بدر) خلوا بالكم من الحتة دى …!

بقلم / صبري محمد علي (العيكورة)

خاص ب [صوت السودان] والخبر (اللافي) وبقوة منسوبا لاعلام مبادرة نداء اهل السودان ان الخليفة الطيب الجد ود بدر سيستقبل الاحد غدا (بام ضوا بان) اعضاء السلك الدبلوماسي المعتمدين بالخرطوم بالاضافة للبعثة الاممية وذلك لتنويرهم حول المائدة المستديرة المزمع عقدها والتى يتوقع لها ان تجمع كل اهل السودان بلا استثناء الا من ابا .

خطوة متقدمة جدا فى نظرى ان يتقاطر اكثر من (٨٠) دبلوماسيا متوقع تلبيتهم الدعوة صوب (ام ضوا بان) الساعة العاشرة صباح غدا الاحد ليستمعوا لاصحاب المبادرة والنداء حول ماهية هذه المبادرة و التعرف عليها بلسان اعجمي من اقطابها و هى لعمرى انطلاقة ذكية وستجد الدعم الخارجي حين يستمعوا لاصحاب اللحى والعمائم يتحدثون عن مبادرتهم بلغات العالم الرئيسية فسيفهم السفراء عمق وجذور وحداثة المبادرة …

وان كان من نصيحة لاهل الدعوة فهى ….
فليعلموا انهم يخاطبون مخابرات تلك الدول فى لباس دبلوماسي وهذه تتطلب قدرا واسعا من الحيطة والحذر فى اختيار المفردات ذات المعنى الواحد قفلا لباب التاويل والاجتهاد

وليعلموا ان اى سؤال قد يطرح يجب ان ينظر اليه من سيجيب الى ما خلف سطور السؤال فكثيرا ما تبنى المخابرات قناعاتها على الجمل الاعتراضية التى ترد بين ثنايا الحديث

يجب ان يسمع العالم ومن خلفه فولكر ومن داخل (ام ضوا بان) ان السودان بلد مسلم لا يجهل حقوق اهل الديانات الاخرى و ان يعلم ان ليس فى ديننا الفجور والمثلية والخلاعة والخمور وان يعلموا ان ديننا هو منهج حياة لا يتم تعاطية داخل المساجد والمسايد والتكايا فحسب بل هو بالقصر كما هو بالاسواق

وان كان من وصية فهى لاهل اللغات ان يبقوا قدام وعلماء النفس وخبراء لغة الجسد ان يبقوا قدام ولا اظن ذلك سيفوت على فراسة الخليفة القاضى المتمرس الفذ الذى عرك الحياة وعركته .

وليعلم اهل المبادرة ان البعثة الاممية آتية بآخر اوراقها وليحذروا من طلب تواصل الاجتماعات وتشكيل لجان واخرى منبثقة فانها (الحالقة) وليكن هذا اللقاء لقاء من حسم امره ولا التفاته الى الوراء فاللقاء لقاء
(امسك لى واقطع ليك)

اهممممم حاجة ان لاتسمح اللجنة المنظمة لهذه الزيارة من دخول من لم ينضموا للمبادرة ضمن الوفد الدبلوماسي
بمعنى آخر ما يجينا فولكر طابق ليك خالد سلك واللا الدقير (نظام) الجماعة اصحابنا وكده طوااالى معليش (نو .. يا مستر ) الجماعة ديل بره لو سمحت !

حا تقول لى ياخ ممكن يا استاذ يحصل كلام زى ده ؟

اقول ليك جدا ممكن .

بكل بساطة عشان واحد من (اربعةطويلة) يقول ليهو كلام مخالف لتوجه المبادرة والحاج (فولكر) يطير بيهو و يقول ليك (ما زالت هناك افكار تتبلور و…..و…..) ومش عارف ننتظر مخرجات اللجنة الفلانية
(لا لا نوووو آسفين يا باشا) انت مدعو لتستمع بس !

اذا ياناس لجنة التامين خلو بالكم كويييس من حكاية (ديل من اهل العريس) التى يتوقع ان تحدث
تمحيص دقيق وصارم ومعاها (صرة وش كمان) واللا اقول ليك بلاش من الصرة دى عشان الضيوف وكده
نظارات نظارات سوداء ياخ مع المعاينا البعيده ديك و ركزوا لى فى العربات المظلله .
قبل ما انسى:—
دعواتنا للمبادرة بالتوفيق