صبري محمد علي يكتب.. آداب لفح الكلام

خاص بـ{صوت السودان}

وكِلا المُفردتين (جر ، لفح) سودانيتين بمعنى أخذ الشيء بسرعة خاطفة وبدون تركيز
ولفح الثوب نقصُد به ثوب المرأة السودانية
أما لفح (الشبشب) فقد إتفق جمهور علماء الإسكافية و (النُقلتية) أنه غالباً ما يخص الرجال وإن كان في الأمر سعة أن يوجد بين النساء أيضاً من تلفح الشبشب .

وقيل عنه ( أي الشبشب) …
أنه كل نعالٍ خفيفٍ مُريح لا يُزرْر ولا يُربٌط
و في ذلك قال
(الكوّاش الحَمَوِي)
أنه يُستخدم عادة داخل المنزل أو داخل أزقة (الحِلّة) إذا دعى الأمر !

هذا المقال نخص به (أخواننا) القحاطة تحديداً

وعطفاً على تحديد عدد (٦) من الناطقين الفكة بإسم تنسيقية حمدوك (تقدم)
وتقديراً مِنّا …
لحالة التوهان والحالة
(المُتأخرة خااالس) من لفح التوب وجر الشباشب التي تسيطرت عليهم عقب تصريح كل مسؤول كبير في الدولة

نقول لهم وبالله التوفيق …
التقلة ..
التقلة …
(التقلة سمِحي)
والتروى في إستقبال الخبر والتعليق عليه (حاجة كويسة)

تحدثنا بالأمس الأول عن حديث السيد جعفر حسن (أحد الناطقين) وتعليقه على خطاب الفريق البرهان الاخير بمدينة (سنار)
شئ يدعو للإشفاق !

فما معقول ياخ …
الزول (أي البُرهان) ما يلحق يبلع ريقو
تطير بيها يا (أبو الجعافر)
اااي يا سعادتك
و جايين و نرحب !
والباب بي وين !
و وكت الدعوة متين !

(حبايبي الحلوين)
روقو المنقة
مُش بتاع
(الخداع الإستراتيجي ده)
عليّا النعمة
يرقصكم (عشرة بلدي) !

ياخ إنتو الله ما خلق ليكم مُخ؟
إنتو ما شايفين خيار الشعب ماشي على وين؟

ثم ثانياً
إنتو الفوضكم منو ياخ؟
وإنتو منو أصلاً ؟

(التقلة سمحِي)
(والله سمحِي)
وجر الشبشب ولفح التوب ما حبابو

طيب ….
أجيكم من الآخر …
إنتو إنتهيتو في نظر الشعب السوداني
إنتهيتو …
يعني (٥٠) صوت كتيرة عليكم
والشعب هذه الايام يستمتع بالعويل والصراخ والاجسام الهلامية التي تخرجون بها عليه
بين الفينة والآخرى

ويضحك ثُم ….
يتفل ثلاث على شماله
(وكت سيرتك يجيبوها)
فإن ذلك لن يضُرُه شيئاً

(٦) ناطقين رسميين بإسمكم !

أتعرفوا ماذا يعني هذا لدى الشعب السوداني
يعني (إتحاد الناطقين الفكة)

أكيد لم تستوعبوها صاح؟
طيب بمعني آخر

بدلاً من (مايكرفون) واحد خليهم سته ياسيدي ياخ إيه المُشكلة؟

وبدلاً من …
ظهور متحدث واحد عبر قناة فضائية خليهم سته يا سيدي أين المُشكلة؟

والهدف ….
هو (الشتات الإعلامي) يعني محل ما تفتح قناة ستجد (قحاطي) يلعلع و يُنظر و يشتم !
أليس هذا هو الهدف الذي غلفتموهم بان تعينكم للسته (المبشرين) جاء مُؤقتاً ريثما تدشنوا منصتكم الخاصة ؟

(ياخي) …
مُذيع لقناة الجزيرة
سؤال واااحد
عن مصدر دخلكم
(خلاكم تتجارو) !

(آآي) نعم أتفق معاكم
أن يكون هناك زول
(رويسو خفيف)
وحساسيتو ضد الشمارات عالية !
لكن بفهم يا جماعة!

والفريق إبراهيم جابر …
بالأمس الجمعة قال عبارة
بقاعدة (وادي سيدنا) لو إستوعبتموها
لبكيتم كثيراً ولضحكتم قليلاً
والعبارة هي ……

(أي جهة تُحاول تجاوز الشعب السوداني لتضع عنه الخُطط أو تُحدد مُستقبله فهي حالمة) .
مؤكداً أن ذلك لن يحدث أبداً

والله بعد ده لو ما فهمتوها
إلا أجيب ليكم فهّامة؟

(مخيّر الله)

السبت ٤/يناير ٢٠٢٤م