العيكورة يكتب: (حمدوك) دمك شربات

(حمدوك) دمك شربات

بقلم/صبري محمد علي (العيكورة)

خاص ب {صوت السودان}

صحيح نعلم ان هناك ما يُعرف ب(تقالة) الدم
والدم البقري
و دم القُراد

وعارفين كوييس جداً …
في ناس يُمكن يطرقوا بابك
بعد الساعة (١٢) بالليل
ويقولوا ليك
إنشاء الله ما نكون أزعجناك ياخ؟

وعارفين كويس جداً
في ناس متطفلو موائد ب
و يحبون السفسفة (موت)
عزمتو
ما عزمتو
بجيك ناطي
لا …
ومُمكن يعمل فيها سيد بيت كمان

وبنعرف جداً في ناس (بطينين) جداً و ممكن (ريحة) كشنة بصلة تفقده صوابه

لكن بصراحة ….
ما عجزت ان اجد له تفسير هو (تقالة) دم القحاطة وارزقية السياسة و عبدت الدولار وعلى رأسهم المحترم الشيوعي حمدوك

ياخ ديل ناس
لا يُحتملوا
ومن هذا (المُنطلق)
ادعوا اولادنا اختصاصيي التحاليل الطبية وعلماء امراض الدم واساتذة الجامعات في مجال (الهيماتولوجي)
ان يتبرعوا بفحص دم هؤلاء
(البني أدمين)
عسى ولعل ان يرفدوا العالم بإكتشاف فصيلة دم جديدة تضاف لفصائل الدم المعروفة عالمياً

(قول لي) الليلة مالك يا أستاذ ؟

اقول ليك يا صاحبي
اليوم قرأت خبر بصحيفة
(صوت السودان)
بتاعت (خالتو)
سهير عبد الرحيم
الخبر تحت عنوان …
تحالف القوى المدنية لإنهاء الحرب ….
أظن لغاية هنا العنوان معقول

لا و (قال ليك) …
و(إستعادة الديمقراطية)

وقبل ما تعضي اصبعك عزيزي القارئ
اصبر عليّ جاييك في الكلام

و (قال ليك) ……
(بقيادة رئيس الوزراء السابق حمدوك)

وفي التفاصيل انه دفع بمطالب (لطرفي) النزاع و ….و ……
و(الاستغراش)
نرسله للأستاذة سهير المُناصرة للجيش بلا حدود ولا احد يزايد على وطنيتها
رغم ان صحيفتها ترى ان الشرعية والتمرد هما
(طرفي نزاع) !
(يا خالتو) ….
ما تتابعي لينا (الدوكة) الشغالة عواسة بلا …..

(طيب) …..
خليك من موضوع (صوت السودان)
حا يطلعوه لينا …
حرية صحافة
و قبول الرأي والرأي الآخر
وكلام من (هذا الذي منو)

المهم تحالف (أخونا)
حمدوك وجماعته المُتدثر في ثياب (الواعظينا) و الذارف لدموع التماسيح
والوهم المُوغل في الغباء
وبلا حياء
يحدثنا عن الديمقراطية وعن الحكم المدني .
ياجماعة نحن ما نسينا
(نجُر الشريط) ؟

و هل الشعب السوداني
بهذه (الكياشة)
حتى يذكره (حمدكا) بالمسار المدني وانه (كااان) رئيس وزراء سابق

فإلى حين فحص فصيلة دم هؤلاء القحاطة (المواهيم) فيلزم ان نذكر ببعض الحقائق …

شباب الثورة و قد اصبح ضد الثورة المسروقة وكفر بها ومن لديه غير ذلك فليخرج ويخاطبهم

والحقيقة التي لا تقبل الجدال ان ..
حمدوك هو ……
صاحب اكبر (خاروق) مره على السودان منذ إستقلالة

(قول لي) كيفن ؟
اول من باع قرارنا الوطني بخطابة المعيب صياغة واخراج السفير البريطاني عرفان خان يناير (٢٠٢٠) م توقيع
(الضوء عشا البايتات)
حمدوك .

أما ديموقراطية قحت فأسالوا عنها ….
ياخ تسأل عنها شنو وتخلي شنو
الدولة المسروقة
العدل
التسيس
الفصل التعسفي
الشرطة
الوسكي نهاراً جهاراً
اذاعة القرآن الكريم التي اصبحت داراً للمثليين
مستشارية للنوع
وعيييييييك

ياخ اقول ليك حاجة
(أسأل العنبة الرامية جمب بيتنا) .

(قال تحالف مدني قال) !
رحم الله من قال في من
اينما توجهه لا يأت بخير ..

نظمت فيك أشعار …
يا شدر العوير اللاّ قعر لا ثمار
يا عُود الطرُور الخوزق النّجار
لا بتنفع سقف لا بتولع نار