مقتطفات الجمعة.. عبدالمنعم شجرابي:  مقطوعة الطاري

.. مقتطفات الجمعة ..

     عبدالمنعم شجرابي

          مقطوعة الطاري

*** كان للسودان السياسي الذي ( يهز ويرز ) والعسكري ( الكارب قاشو ) والإداري القادر والتنفيذي المقتدر ( فخلف من بعدهم خلف ) أضاعوا السودان ( وطلعوا زيتو )

*** مفاوضات جدة شغالة والناس منقسمة ( تكورك ) بين مؤيد ومعارض وكأن المسألة هلال مريخ والكأس ينتظر من يصعد ( منصة التتويج )

*** نفسي ( آخذ برأسه ولحيته ) وأصرخ فى وجهه قائلاً ( انت السبب في كل البيحصل ده ) نفسي أقابله ( لأبصق عليه )

*** نعم في غياب الهلال ( سيد الاسم ) وغياب العاصمة يمكن أن يكون الهلال بورتسودان ( الهلال العاصمي ) فهلا ارتقى هذا الهلال ( وترقى ) إلى ذلك؟؟؟ نعشم

*** سألتني صغيرة صديقي ” ليه يا عمو السودان ما منظم ونضيف زي مصر “

( طنشت ) بأمل أن يجيب كل فرد من ( أجيال الخيبة ) على السؤال

*** شكراً جميلاً العزيز سعادة السفير محجوب محمد عثمان شكراً نبيلاً العزيز سعادة السفير عبدالعزيز حسن صالح وشكراً وسيماً سعادة سفير السودان بالقاهرة شكراً أنيقاً ونحن ( نتفق ونختلف ) وإن ( أفسد الاختلاف للسودانيين القضية )

**** ( مقطوعة الطاري ) اتفاقية الحريات الأربعة التنقل والعمل والتملك والإقامة الموقعة بين مصر والسودان ( ياحليلا ) قتلتها الحرب ( والقاتل ) ليس السودان والجثمان دفن على أراضيه ( وهذا ما لزم التنويه )

*** أمبارح شفت المأذون طالع من المسجد والله يا شدرابي ود خيتي ست الجيل دميعاتي جرن وأنا أتذكر الشباب العقد ليهم وماتوا والعرسان الكان مفروض يعقد ليهم وما تم .. غايتو الحرب وجع وجع وجع قلب الله يلعن الحرب محل ما قبلت

*** عاصمة بلا منتدى .. ولا حفلة .. ولا ندوة .. ولا ليالي .. ولا أمسيات هي الحرب حولتها خراباً لعن الله الحرب ومن أشعلها

*** طالبت الجامعات المصرية الطلاب السودانيين بسداد القسط الأول من الرسوم ( الإضافية ) والبالغ 900 دولار عبر البنوك ليتفاجأوا أن البنوك تطلب عمولة

( واحنا مش عارفين تجينا منين ولا من فين )

*** هل لي أن اسأل عن ( بشة ) وأخباره؟ .. وأين هو؟ وماذا يفعل؟ وكيف يقضي يومه؟ وماذا عن مستقبله؟ وبم يفكر؟ .. وبالمناسبة أنا اسأل عن ( بشة ) لاعب الهلال الذي ( حكم ) الملايين ( بمزاج ) عدة سنين واجبر على الاعتزال والتنازل عن العرش

*** لم يسألني انت منو ولما سألني انت شنو فهمت السؤال وقلت :

 أنا مؤمن .. سوداني .. وطني .. حر .. ديمقراطي .. ثائر .. عطبراوي .. هلالابي ( ود ابوي وامي ) لا كوز ولا قحاتي

( ولست من الظالمين )

وهذا من فضل ربي

*** اللهم اغفر ذنبنا ويسر أمرنا وأرحم آباءنا وأمهاتنا وجميع موتانا وأصلح حال بلادنا وأعدها إلينا وأعدنا إليها آمنين مطمئنين

 جمعة مباركة وكل جمعة وانتو طيبن