مقتطفات الجمعة .. عبد المنعم شجرابي مقابر جديدة

.. مقتطفات الجمعة ..
عبد المنعم شجرابي
مقابر جديدة
*** يهتمون بالذين استغلوا النازحين ورفعوا لهم الايجارات بصورة سخيفة ( ويهملون ) الذين فتحوا بيوتهم واستقبلوا النازحين هاشين ومرحبين
( يركزون ) على سلوك سودانيات بالقاهرة لا قيمة لهن ( ويتجاهلون ) شريفات سمحات يكسبن بالحلال الطيب
( يقدمون ) متفلتين بمصر مكانهم حراسات الشرطة ( وينسون ) مصلين يعمرون بيوت الله
عفواً لا عليكم بمناصري ( القبح ) على ( الجمال ) لا عليكم ( بالناظرين ) إلى نصف الكوب الفارغ لا نصفه الممتلئ لا عليكم بالسلبيين وأعداء ( الايجابية )
*** جاء عيد الفطر والبلاد تعيش الحرب
ومضى عيد الأضحى والبلاد تحت ويلات الحرب .. الجديد ( ولا جديد ) أن الجيش احتفل بعيد الجيش والحرب اللعينة هي الحرب ومضت الأعياد بلا طعم للأعياد
*** لا إنتاج جديد في قصائد الفخر والتفاخر .. لا منتج جديد في أغاني الحب والغزل ولن يكون في الحنان ( والحنية المميتة ) فقصيدة وأغنية الحرب ( هي الحالة )
والناس ( حالها يغني عن سؤالها )
*** قال القرقور لأمه السمكة لا تشفقي علي إلا تشوفيني ( في الصاج ) وبذات ( رسالة الطمأنينة ) المملوءة بالعزيمة يبعث النازح برسالته إلى من هو بالعاصمة ويبعث العاصمي للنازح
وهنا وهناك ( الهم بدل واحد يبين همين )
*** كشف النزوح أن ( مواعين الاستيعاب ) بمدن السودان المختلفة أضعف من ضعيفة .. كشف النزوح أن كل المدن تحتاج إلى مباني ومرافق وخدمات أساسية وقبلها
( مقابر جديدة )
*** الزول ده نصحوه ولم ينتصح .. الزول ده كلموه وما سمع الكلام .. الزول لا فكر ولا قدر ولا شاور بس كده ( شال وختا ) وقعد معانا محتار ..
الزول ده شوفوا ليه حل
*** شدرابي ود خيتي ست الجيل عليك الله ما تسألني وخليني أسألك من حالك وأحوالك ووليداتك
بت أحمد يسأل منك الخير كويسين وما عندنا عوجة تب وهمنا البلد والأهل والجيران والحبان
بت أحمد ياكي بت أحمد الجميلة الحنينة يملأ جوفك صحة وعافية
*** نحنا كده
انتو كيف !!؟؟
*** من قيادة حركة العدل والمواساة ( أعفى ) جبريل بعض زملائه كما تم ( اعفاؤه ) وجبريل إبراهيم ( العافي والمعفي ) لا سبب يجعل ( إعفاءه ) من وزارة المالية يتأخر إلى الآن
( جبريل كفاك وكفانا يلا ادينا عرض اكتافك )
*** بيني وبينكم كلما وددت أن أسأل عن ( الإعلام الخارجي؟ ) أخجل من ( طرح السؤال )
*** النيل هو النيل ( والموية لا تروي ) .. الأكسجين هو الأكسجين ( والاختناق حاصل ) .. السكر ( ما حلو ) والملح ( ما طاعم ) .. الونسة والضحكة ( ليست هي ) .. والفرق واضح بين ( النازح ) و( المواطن ) حتى ولو كان الوطن تحت لهيب الحرب
( وآه وآه من الحرب آه )
*** بعد كل خبر حزين يأتي خبر حزين .. بعد كل رحيل عزيز يرحل عزيز .. فنبكي رحيلهم مع الباكين ونبكي أننا ماشيعناهم ولم ندخل السرادق لنعزي أنفسنا فيهم
نسأل الله لهم جميعاً الرحمة والمغفرة
اللهم وبقدرتك ياقادر يا مقتدر اعدنا إلى بلادنا وأعدها إلينا آمنة مطمئنة
جمعة مباركة وكل جمعة وانتو طيبين