شمارات.. سلك | باقي أتراك وبرة التراك

*قبل أي شي

*عرفتوا الكلمة الشاذة ولا عاملين رايحين؟؟؟

*مامشكلة

*كلنا رايحين

*فالشعب السوداني خرج ولم يعد حتى الآن

*اوصافه كالآتي

*من القامة طويل القامة

*له من الارث التاريخي وسط الشعوب ما يجعله يزهو مرفوع الرأس

*عيونه عسلية

*لايرى في الوجود الا الاشياء الجميلة

*ناعم الشعور

*مشلخ زي كي بورد الموبايل

*شي مربع وشي سلم وشي نجمة

*سليم العقل لحدي ماخرج

*بعد داك حصل ليهو شنو مامعروف

*هل فقد عقله في السوق

*ام افقده جبريل عقله بالرسوم

*ام فقد عقله عند فض الاعتصام

*من ناحية العقل ده مامعروف الحاصل

*يرتدي هموم الوطن وينتعل الامل وماشي لي قدام

*المرجو ممن يتعرف عليه ان يبادله الاحضان ويقول ليهو انت وين ياراااااجل

*هذا الشعب السوداني مر بفترات حكم متنوعة

*وطنية كانت ام حكم المستعمر

*الاشياء الجميلة ظلت في ذاكرته

*كل الايجابيات كانت في فترات المستعمر

*علمونا الطبيخ

*وورونا الوطن الواحد

*الساقية والشادوف

*عملوا الشوارع والكباري وسكك حديد السودان

*النقل النهري والخطوط البحرية وبورتسودان

*الاسم ذاتو خواجاتي

*سودانير

*سودان إير

*اسم اعجمي لعبنا به

*وفي نهاية اللعبة اضعنا خط هيثرو

*المستعمر جانا يشيل خيراتنا

*ادانا خبراتو

*عمل مشروع الجزيرة

*فعطشنا مشروع الجزيرة والمناقل

*نحنا كدة

*ولم يتبقْ لنا من انجازات الاستعمار الا بعض كلمات نرددها

*اجزخانة وأدب (خانة) ومعليش (ماعليه شي)..

*محمد علي باشا، جانا كايس الدهب والرجال

*مرق كيت

*الدهب والرجال مرقهم باشا تاني

*حتى لقب باشا هو احد مخلفات الاستعمار (ياحليلو)

*وخرجنا من الاستعمار بخفي حنين

*وخرج الاستعمار من بلادنا بخاطره

*اظنهم عرفوها بدري

*كل ذلك جال بخاطري وانا واقف جوار مدرسة حي الاسبتالية الابتدائية

*اسبتالية ذاتها بواقي استعمار

*هوسبيتال

*لم يتبقْ لنا من الاستعمار الا بواقي كلمات اتراك ونحنا برة التراك

*تراك الدولة المحترمة المنتجة والخدمة المدنية النموذجية الذي تركه لنا الانجليز..

*أها

*نجي لي شمارات والي الخرتوم

*ياربي الانجليز بقولوا ياحليلنا يا والينا

*ولا بقولوا بركة الله حلانا يا اخينا..

شمارات الكلب

ننساك كيف والكلب قال ايهم اكتر عددا… شهداء كرري الميامين ام شهداء الاعتصام العظيمين؟؟؟ تقول لي مستعمر؟ مستعمر بالما ولا بالتاتشر؟؟؟؟

والى لقاء