شمارات.. سلك | واقف ديدبان

*بتعرفوا الديدبان؟؟؟

*الديدبان

*بس ياهو ذاتو

*اها الديدبان ده بقي ماعندو شغلة غير السودان

*ناس السوق قالوا الروب

*زول بشتري مافي

*تلقي السوق مليان عربات وتكاتك ودرداقات

*وزول بشتري مافي

*البنطلون بي الف

*والناس ماشة عرايا وحفايا

*ماشة وين مامعروف

*السوق واقف ديدبان

*تمشي الصنايعية

*زول بدق شاكوش مافي

*زول ماسك مفك مافي

*حتى المفتاح الانجليزي ماشغال

*ياخ (الشحادين) ماشغالين

*حالهم واقف ديدبان

*زمان (الشحاد) في رمضان بطلع ليهو بكم مليار

*والله اسي بقولة الله يدينا ويديك مابطلع

*وبالمناسبة دي

*وبمناسبة الناس البتقول ياحليل ديك

*كانوا بياكلوا وبأكلونا

*نقول ليهم

*تتذكروا نكتة الخواجة الامريكي الجا جمب جامع الخرطوم الكبير ولقى ليهو شحاد حالتو صعبة يشكي لطوب الارض

*لكن تصادف انو الخواجة كان ماشي على المطار وغير رسوم المغادرة لايملك

*كان جينا مارقين متخارجين ليهم من البلد دي

*يدفعونا رسوم مغادرة

*قال يأكلونا قال

*المهم

*نرجع للخواجة

*الخواجة رجع نيويورك ورسل دولارات للشحاد الجمب جامع الخرطوم الكبير

*الف دولار بواسطة القصر للشحاد

*الظرف جا بالجي اتش ال

*التحويل كان محظور

*اظنو محظور عشان بأكلونا

*المهم

*الزول بتاع القصر شال خمسمية دولار ورسل لبتاع الخارجية خمسمية دولار قال ليهو دي جات من خواجة للشحاد الجمب الجامع اديها ليهو..

*الزول بتاع الخارجية لفح ميتين وخمسين دولار ورسل الميتين وخمسين لبتاع الولاية

*قال ليهو دي ميتين وخمسين دولار رسلها خواجه للشحاد الجمب الجامع وصلها ليهو

*بتاع الولاية لفح مية وخمسين ورسل لبتاع المحلية مية دولار قال ليهو وصلها للشحاد الجمب الجامع قول ليهو رسلها ليك خواجة  ..

*بتاع المحلية مشي للشحاد وقال ليهو

*الخواجة قال ليك الله يدينا ويديك

*ويجي زول يقول ليك كانوا بياكلوا ويأكلونا

*قصدك يأكلونا ولا ياكلونا؟؟؟؟

*المهم

*كلو شي واقف ديدبان

*وكلو زول راكب راس

*الشغل وقف

*واقف ديدبان

*ياخ لو تصدق الببيع الكفن ماشغال

*في اليوم آلاف الجنائز بتمشي المقابر

*وبتاع الكفن ماشغال

*زول بشتري منو مافي

*ياربي الناس ديل بدفنوهم موضة؟؟؟

*مولاي كما خلقتني؟؟؟

*معقولة حال يقيف ديدبان لدرجة حق الكفن ماتلقاهو؟؟؟؟

*ده ديدبان شنو ده الله ابتلانا بيهو ده

*ديدبان يوقف اي شي

*يوقف القلب ذاتو!!!!

*اها

*نجي لي شمارات والي الخرتوم

*كان شفت يا والينا

*ناس قالوا السودان

*وناس قالوا الديدبان

*وناس قالوا البرهان

*وناس قالوا الديدبان ياهو البرهان

شمارات الكلب

ننساك كيف والكلب قال اجمل لعبة الفات وفات وفي ديلو سبعة حكومات والعسكر واقف طابور….والعسكر واقف طابور وعمو فلان غمت للديدبان             …يأكلونا

والى لقاء