شمارات.. سلك | قالوا القصار طالوا

*عندنا مثل بقول

*كلام القصير مابنسمع

*رحم الله أستاذنا القامة السامقة الشاهق علي محمود حسنين

*كلمكم

*قال ليكم

*لكن كلام القصير مابنسمع

*وأستاذنا علي محمود آخر السياسيين البفهموا في السياسة ماقصير

*فمقامه سامق وشاهق

*لذا كان كلامو على مستوىً عالٍ

*لذا ما انسمع ليكم

*المضقلمين سياسياً يرون أنهم قامات

*فقادوا وطننا لمكبات القمامات

*والقصار طالوا

*طالوا لدرجة اتحكموا فينا

*يوم اتفقوا ويوم يقوموا فوق

*الآن نجد أن الذين تطاولوا علينا

*يزحفون بالتوقيع ليوم ستة أبريل

*ماعبط

*ولكن لأنهم يعلمون ماذا يعني ستة أبريل لهذا الشعب الجميل

*ويعلمون ماذا سيحدث في ستة أبريل ذلك

*وماسيحدث حايكون سبباً كافياً

*ليس لتأجيل التوقيع في كشوفات الوطن

*ولكن لإلغاء التوقيع ذاتو

*كايسين شماعة ولقوها

*وده كلو هين

*المحيرني تلك العلاقة الحميمة الغريبة المريبة بين ذلك الحزب وبين الدعم السريع

*مودة زي المودة

*وجدي الله يرحمو قال لي ماتبيع ياولدي

*وكان بعت ماتبيع (رخيس)

*ياحليلك يا جدي

*وياحليل المبادئ

*أصبحنا شعب يتقن التسويق

*بنبيع أي شي ولو كان مبادئ أو قيماً

*وبعد نبيع بنطلع بي حقنا

*كومشنات ياجدي

*زول ساااي ممكن يطلع ببوكس جمل

*وزول ساااااي ممكن يطلع بوزارة

*بيع شديد

*حتى طفلنا لما يولد

*في أضانو اليمين بنقول ليهو بيع

*وفي أضانو الشمال بنقول ليهو اطلع بحقك ماتبقى عوير

*وعند ختانه نقول له كده انقطعت علاقتك بالوطن

*عشان يكبر وهو مابعرف معنى الوطن

*ويقوم يبيع

*بيعوا زي مادايرين

*بس ورونا علاقتكم بالدعم السريع دي سرها شنو؟

*وبتكلف الدعم السريع كم

*أيها الناس

*زماااااان

*هرب طيار ألماني بطيارتو لانجلترا

*أيام الحرب

*استقبلوهوا أحسن استقبال

*يوم قالوا ليهو ورينا مقدرة ألمانيا الحربية

*رفض

*وقال ليهم أنا ضد هتلر ولست ضد ألمانيا

*ده حب الوطن

*بتعرفوا وطن يا البعتوا؟؟؟؟

*أطال الله وجودك بيننا أستاذي علي محمود بمواقفك ومفاهيمك ووطنيتك المدهشة

*أها

*نجي لي شمارات والي الخرتوم

*كان شفت يا والينا

*ماتبيعوا قالوا لينا

*وموش حانبيع مهما دفعوا لينا

*واضح يا والينا؟؟؟

شمارات الكلب

ننساك كيف والكلب قال المبادئ بقت مفروشة على الأرض والمكرفون يردد تلاتة بخمسمية…        .ياحليلكم

وإلى لقاء