شمارات.. سلك | قيراطS24

*كلما جلست أمام شاشة سودانية ٢٤

*تتملكني الدهشة

*ويحدوني أمل كبير في أننا لو أدينا العيش لخبازو واشتغلنا بضمير واجتهاد يمكن أن نصل

*سودانية أربعة وعشرين قيراط

*الشاشة خلابة صافية زي ماقال الكتاب

*الصوت كأنه يأتيك من جواك

*حتى الوجوه معزولة عزل

*البرامج لو شالوا الشعار من الشاشة

*تقسم أن ماتشاهده ليس على شاشة سودانية

*موضوعية في الطرح والتناول

*علم وفهم وتخصصية

*وكورال كلية الموسيقى يضيف ألقاً للأغنية السودانية وعلمية

*ثم تتجول الكاميرا

*لترصد إشراق الرائعة دوماً سلمى سيد

*وجه يجبرك على النظر إليه  برزانة

*كل شي جميل

*وبمناسبة الجمال

*والجمال نعمة

*ربنا لما يخلق زول جميل

*هل هذه نعمة للزول الخلقوهو جميل

*ام نعمة لنا نحن الذين نرى ذلك الجمال وننعم به ونرتله ترتيلا؟

*شكراً سودانية أربعة وعشرين قيراط

*المهم

*النسوان طبعاً مافي شي بكيفهن زي لما تكمل حاجة من حاجات البيت

*الواحدة تجيك بفرح شديد

*السكر كمل

*فرحانة عشان السكر كمل

*كأنو مرض السكر راح من زول

*وتجييك جارية فرحانة

*الزيت كمل

*أكتر حاجة بكرهها في حياتي الزيت ده

*لو داير تغير زيت العربية بدون مصفى

*داير ليك تمويل أصغر

*ولو زيت البيت كمل داير ليك مرابحة عديل كده

*نسوان بصرفن زيت بصورة ماطبيعية

*تقول كاسرات شمبر

*نقول ليهن الزيت ده بالذات بجيب السرطانات حمانا الله وإياكم

*والله لو بجيب الموت عديل مابخلنو

*جنهن زيت

*ولعل السبب يكمن في دعايات الزيت المسكوب على شاشاتنا

*يخيل لي الواحدة لما تجيب الزيت وتكبو شوووو على طريقة الدعاية

*بتبقى نايرة زي،البت الفي الدعاية

*وأولادها الغبش الحفايا الجاريين في الشارع اليوم كلو ديل ببقوا زي شفع الإعلان يتدردقوا على أطقم جلوس كتلك التي تظهر في الإعلان

*بس الشي الوحيد المابتخيلنو انو نحنا نبقى نايرين ومرطبين وسمحين زي الرجال البلهطوا في إعلانات الزيوت

*لو فكرن في الحتة دي تاني مابقولن الزيت كمل

*وتجيك فرحانة شايلة خبر حاجة كملت

*بستمتعن لما حاجة تكمل

*ياخ الواحدة قبل تلاتة شهور من رمضان تعوس الحلو مر بالشي الفلاني

*وتردمو ليك شهر في السرير تغطيهو بأغلى ملاية

*يوم تمنية رمضان تقول ليك الآبري كمل

*دي شبكة شنو دي يا ربي!!!

*نموت يعني؟؟؟

*وبمناسبة الموت

*واحد مدمن تدخين

*يولع… تكمل يولع بيها التانية

*جمبو واحد تاني قال ليهو

*بالمناسبة التدخين ده موت بطئ

*صاحبنا قال ليهو صدق أنا مامستعجل

*أها

*نجي لي شمارات والي الخرتوم

*كان شفت يا والينا

*الزيت كمل

*تجيبوا الزيت ولا السليقة واجب علينا؟؟؟؟

شمارات الكلب

ننساك كيف والكلب قال ماحصل وردة يوم قالت لي الشي الفلاني كمل لأنها مقدرة الموقف ومدبرة الشأن.

وإلى لقاء