شمارات.. سلك | بوليس زمان

*ياحليل رمضان

*كمل مافضل فيهو شي

*الله يقبل غايتو

*المهم

*الليلة اتذكرت بوليس زمان

*زماااااااان

*ايام البوليس بلبس طاقية كاوبوي

*فيها ريشة بالجمبة

*وردا

*وقلاشين

*وقلاشين لغير الناطقين بها

*هو شريط ضاغط من الصوف يلفوهو حول الساق من البوت للركبة

*وبندقية اب عشرة

*وكومر في احسن الحالات بنزين

*في الزمن داك مافي جريمة كشفها بيصعب على البوليس

*بوليس زمان ياعمك

*وكان البوليس عندو قصاص (اتر)

*يا معسكر يا متعاون

*المجرم لو مرق في الابيض

*قصاص الاتر بجيب خبرو

*البوليس كان بوليس

*ماشفنا بوليس اطلق النار الا على الكلاب الضالة تتفيذا لأوامر عليا تهدف لمصلحة المجتمع

*في موسم السعر تكون الكلاب الضالة عاملا اساسيا في انتشاره

*ولو البوليس لقى كلب في الشارع تطوق عنقه قلادة تتدلى منها ميدالية البيطري التي تشير الى ان هذا الكلب مطعم

*فإن البوليس لايوجه سلاحه لذلك الكلب الذي نفذ اوامر الدولة وقام بالإجراء الصحي المطلوب الذي وفرته الدولة مجانا لجميع كلاب الوطن

*بوليس زمان مافي زيو بوليس

*ولانقارنه بأي بوليس

*لابوليس الزمن ده ولا بوليس الزمن القادم

*المباحث كان يطلق عليها البوليس السري

*اها

*قال ليك واحد من مباحث زمان اسمو محمد سيداحمد

*نقلوهوا الدويم

*مشى يجهز البيت للأسرة وكدة

*وجهز البيت وعلق عليهو لافتة كتب عليها

*محمد سيد احمد بوليس سري

*فانتشر السر بين جميع اهل الدويم

*والغريبة نجح في شغلو وكشف الكثير من الجرائم

*بوليس زمان

*زي ايام زمان

*مابتقارن ببوليس اي زمن

*كيف نقارنه وبوليس الزمن الغريب يوجه سلاحه لصدر مواطن نهارا جهارا

*كيف نقارنه وبوليس الزمن الغريب يقيف في عقبة ابسط الجرائم؟؟؟

*كومر البنزين ما كشفه من جرائم فشلت كل البكاسي الحديثة والتاتشرات في كشف ربعه

*تحية لبوليس زمان

*للكسكته ام ريشة

*للردا

*للقلاشين

*ولقلب الشرطة النابض في ذلك الحين

*اها

*نجي لي شمارات والي الخرتوم

*كان شفت يا والينا

*الشرطة لو ماقادرة تحمينا

*مافي مشكلة بتجينا

*بنحمي نفسنا برانا يا والينا

*اخير نكتفي بأن نتسلح بالصبر والشرطة تحمينا

*بدل نتسلح ونحمي أنفسنا  برانا يا والينا

شمارات الكلب

ننساك كيف والكلب قال لما الشرطة كانت بتكتل الكلاب الضالة كنا بنصفق ليها لكن لو بقت بتكتل من طرف بنعضيها

والي لقاء