شمارات – سلك | حبيبي يا رسول الله

*يا حليل رمضان

*كمل

*مافضل فيهو شي

*جانا زي البرق

*جكك

*وفات

*ياحليلو

*الخميس الجاي ده خليهو

*الخميس دورو ماتشتغل بيهو

*الخميس البعدو جليهو

*تاني فضل فوقو شنو؟؟؟

*ماشبعنا منو

*لأننا شعب لايأكل إلا في رمضان

*وحداشر شهر نصوم بأمر السياسات الاقتصادية الفاشلة والسياسيين الفشلة والاختلاسات وتهريب دهب الوطن

*زمان أهلنا بقولوا رمضان العشرة يوم الأولى في الشحم

*العشرة التانية في اللحم

*والعشرة الأخيرة في العضم

*أسي الدقيقة الأولى في الأنكل

*ولكنه يمضي ليكسو العضم لحماً

*بنشحم في رمضان

*لأننا لا نأكل أكلاً  فيهو فايدة إلا في رمضان

*وباقي السنة بنتأكل

*بياكلونا

*الله لاجاب عقابهم

*المهم

*أمس واحد قال لي الخوف السنة دي يأجلوا لينا رمضان

*قلت ليهو الخوف ما من دي

*الخوف من جبريل يسمع يقوموا يزيدوهوا لينا

*سبحان الله

*جبريل ينزل وجبريل يرفع

*وشتان مابين جبريل وجبريل

*أيها الناس

*لما يأذن تلهط ليك تلاتة كبابي عصير قبل الأذان ماينتهي

*عملية زي دي السنة كلها بتلقاها متين؟؟؟؟

*وتدخل ليك في عصيدة قدر جبل مرة

*محاطة بتقلية أو شرموط زي الشرموط من كل النواحي كما أحاطت المياه بالمناقل وريفها في الخريف الفات ده

*دي كان ختنوك تاني بتلقاها

*وطعمية وطعمجة

*سلطة الروب يعود الفضل ليها بأنها تذكرنا بأن الروب أبيض

*نسينا لونو ذاتو

*وبعد ده تحلية

*علي اليمين آخر تحلية تكون شفتها في الآية الكريمة

*(أومن ينشأ في الحلية وهو في الخصام غير مبين)

*صدق الله ربي وربك منزل الرحمة على العالمين

*ياحليل رمضان مافضل فوقو شي

*اللهم تقبل صيامنا

*وقيامنا

*وقيامنا بلاد بره

*وتراويحنا

*وتهجدنا

*واجعلنا من المعتوقين

*ومن المعيدين

*وبلغنا رمضان القادم يارب العالمين

*ديمقراطيين

*في دولتنا

*في حكومتنا

*في قناعاتنا

*في سلوكنا

*وألف بين قلوبنا يارب العالمين

*اللهم يامنتقم ويا جبار

*عندنا شهداء

*قدموا أرواحهم فدا لينا لرفع البلاء

*اللهم تقبلهم

*ولاتضيع حقهم

*وانتقم لهم اللهم بانتقام من النوع داك يارب العالمين

*أها

*نجي لي شمارات والي الخرتوم

*كان شفت ياوالينا

*بنصوم مابصعب علينا

*أصلو الصيام طول السنة مفروض علينا

*والله يرفع البلا العلينا

شمارات الكلب

ننساك كيف والكلب قال بختكم أحلى أيامكم جات.

وإلى لقاء