شمارات.. سلك | ود جاد الله

*قصة قدييييمة

*ولكن لها ماورائها

*ليها مداولات لاتخطئها عين

*وإشارات يلتقطها الناس بسهولة

*تحكي القصة عن ود جادالله

*بدري الكلام ده

*أيام الفوضى

*في ذلك الزمان كان الأعرابي يخرج بفرسه من جدة

*ويبرطع لي أم بدة

*قشة مابتعتر ليهو

*لا رسوم عبور

*ولا أتاوات ولاية

*ولا تأشيرة دخول

*يبرطع ساااااكت

*برطعك برطعك برطعك

*اذا قابلو قوم في تلك الفيافي

*بقول ليهم مرحى ياقوم

*القوم يرد عليهو بهلا باخ العرب

*ويبرطع

*في زمن البرطعة داك السودان كان في

*اكتشفوهوا يا دوبك

*وبرضو كان فيهو برطعة

*وقبايلنا وقبايلكم

*مضاربنا ومضاربكم

*ونغير عليكم نخلي ريحتكم طير طير

*وتغيروا مننا تقوموا تغيروا علينا

*أكتلك أخنقك فطسك

*في دار أبو منو مامعروف

*في زمن البرطعة داك والتخلف

*كانت البلد فوضى وتعج بكراهية لا مبرر لها يحفها الحسد والجهل

*لذا كانت القبائل والأسر والعوائل تغير على بعضها البعض

*الموضوع ماكان رجالة

*لكنه كان سرقة مستترة وبلطجة تطلق على البلطجي فارس

*في الزمن داك في زول اسمو ود جادالله

*زول ساي

*مقطوع من شجرة

*لا اهل لاقبيلة لاشغل لا مشغلة

*ربنا انعم عليهو ببسطة من الجسم عجيبة

*زول قدر الجبل

*تاتشر بس

*ويمشي متضرع

*ود جاد الله ده جا ماري بقبيلة

*ناس القبيلة استضافوهوا

*بعد ضرب الشواء واحتسى لبن الإبل

*بدا طق الحنك

*سألوهوا عن اهلو

*قطع ليهم قصة من راسو

*خلاصتها انو اهلو ابادهم العدو وهو كان مافي

*ناس القبيلة انبسطوا

*وعرضوا عليهو يبقى واحد منهم

*ويعرسوا ليهو من بناتهم

*الزول قدر التاتشر اقول ليك

*وعرسوا ليهو

*وقضى شهر العسل ورا الجبل في خيمة فخيمة

*ثم عاد لمضارب القبيلة

*لقاهم عملوا ليهو خيمة مفروشة في الطابق الأرضي

*شملتين وهول بالمنافع

*وسكن معاهم

*الصباح يطلع على ناس القبيلة

*الحرب ماجات ياناس؟؟؟

*يقولوا ليهو ماجات ياود جادالله

*يقول ليهم بتعيشوا بدون حرب كيفن عاد

*وهكذا دواليك

*يوم ود جادالله متجدع في خيمتو

*السيدة حرمو بتمسح فيهو

*ماسكة الرجل اليمين

*قاطعة ليها فيها قزازتين سمن والرجل لسه ما انتهت

*زول بطاح بس

*انتهت الرجل اليمين

*يسمعوا ليك صوت صراخ وضجيج والدنيا ليل قمر مافيها

*والناس تكورك

*الحرب الحرب

*العدو غار علينا

*وااااااي

*النسوان يصرخن

*وووووب

*الرجال يتجارو

*ود جادالله سأل مرتو بهلع

*في شنو؟؟؟

*قالت ليهو الحرب….العدو هجم وحرق الخيم وحلب الغنم

*ود جاد الله قال ليها العدو جا بي وين؟؟؟

*قالت ليهو جا بي جاي من الغرب

*ود جادالله قد القطية بي الشرق وهاك يافكيك

*الشردة الياها

*وبعد انتهت الغارة وطلعت الشمس

*شاعر القبيلة قال

*ود جادالله الدايره بي عينو شافا

*كراعو الغبشة فاتت كراعو الممسحة بي مسافا

*أيها الناس

*الحصل في القسم الشمالي ده شنو؟؟؟

*هل عدنا لعهد برطعك برطعك برطعك؟؟؟؟

*طيب بالطريقة دي ود جادالله حايجري على وين؟؟؟؟

*أها

*نجي لي شمارات والي الخرتوم

*كان شفت يا والينا

*أولاد جادالله كتااار عايشين بين ظهرانينا

*والجكة من ناحية جايانا بتجينا

شمارات الكلب

ننساك كيف والكلب قال والله نحنا بي كرعيننا الكتار ديل ماحانعرف نمسح ياتا ونخلي ياتا ونجري بي ياتا.

وإلى لقاء