شمارات – سلك – بذوب بي دهبو

*طيب

*قول ذاب

*الرتب كيف؟؟؟

*قول الحتة دي عالجتها اتفاقية سلفاكير

*الدهب كيف؟؟؟

*هل بذوب بي دهبو؟

*لو قلنا نعم

*يعني يكون فكة ناسو عكس الهوا؟؟؟

*أتذهب وذوبهم؟؟؟

*دي طريقة دي يا إخوانا؟؟؟

*والملح والملاح!

*والخطب الحماسية؟؟؟؟

*وأحلام جماعتو؟؟؟؟

*لا….لا….لا مابذوب

*أقصد مابصدق

*الكلام ده زي الخيال خيال

*إذا القوات المسلحة استوعبت

*يجب عليها أن تستوعب الناس والماس

*فالأحجار الكريمة تصبح أكرم إذا نعمت بالسكن داخل الخزانة العامة

*والآليات والتاتشرات والجبخانة

*ياخ دي هيلمانة صعب ذوبانها

*عشان كده مابصدقكم

*وكأني أراه يحضن الماس مردداً رائعة عثمان حسين

*مابصدقكم

*مابصدقكم

*ده حبيبي الروح بالروح

*وياروح مابعدك روح

*أيها الناس

*يحلها الشربكها

*امشوا للشربكة في كوبر (إن كان لسه هناك)

*وقولوا ليهو حلها

*حلها وحقك بره

*بنعتبرك شاهد ملك

*بس حلها

*قال يذوب قال

*ياخ لبن البدرة بقى مابذوب

*فما بالك من لبن القدرة (بضم القاف)

*أيها الناس

*صدقوني

*يايحلها الشربكها

*يانشربكها

*ويحلها الجيل الراكب راس

*هذا الجيل الراكب راس

*لا داير يركب كرسي وزارة

*لاداير يركب فارهات الدولة

*لا داير يركب في راس زول

*كل الدايرو وطن آمن وطن واسع لا مهموم ولامظلوم ولا ظالم

*وطن ينمو يوماتي

*يجيب الحقنة للعيان

*شفعو يمشو الصباح المدرسة

*يلقوا مدرسة

*يلقوا كتاب

*يلقوا كراس

*يلقوا أستاذ

*ودرس العصر مجاني

*ويلقوا وظيفة بعد التخرج

*مظاليمو يلقوا قصاص من الجاني في دولة القانون

*وطن لافيهو شافع لافي يقول ورنيش

*لافيهو شماسي ساكن الكورنيش

*لافيهو هامش وتهميش

*وطن راكب راس

*أها

*نجي لي شمارات والي الخرتوم

*كان شفت يا والينا

*لوح التلج غير السخانة مافي شي بذوبو لينا

*بالبرود ده بقعد تلج يا والينا

*ويجيب الالتهاب لينا

شمارات الكلب

ننساك كيف والكلب قال الله يجازي الشربكها .

وإلى لقاء