شمارات.. سلك | طواااالي تعتذر ياموسي!

*موسي الزومة شخصية رياضية واجتماعية محبوبة جدا

*الراجل خفيف ظل ونقي سريرة وابيض ضمير

*كان شغال طرف شمال

*سكن سكنه في الخانة دي

*والمستوى الفني الجا بيهو موسى المريخ

*ياهو المستوى الفني المشى بيهو موسى من المريخ

*برغم السنين الطوال والمدربين الاجانب الكتار والاحتكاك والاسفار

*موسي دمو خفيف

*وكان في ثنائية بينو وبلة جابر

*برغم بعد المسافة

*ده طرف شمال وداك طرف يمين

*المهم

*نكات كتاااار اتقالت في موسى

*بعضها يحمل شيء من الحقيقة

*وبعضها يقوم على مواقف موسى الكوميدية

*قالوا يوم فيصل عجب (الملك) الكورة جاتو لعبها بي كعبو لموسى

*موسى قلشها وقال (سوري) ياكابتن

*تاني الكورة جات لفيصل مررها لموسى واخد خانة

*موسى(سرجها )طلعت اوت وقال سوري يا كابتن

*تاني جات للعجب لعبها رأسية لموسى

*موسى نطحها طلعت آوت وقال سوري يا كابتن

*فيصل عجب مر من اتنين وعمل المرجيحة ومررها لموسى

*موسى اداها لواحد من الاتنين المر منهم العجب قبيل وقال سوري ياكابتن

*قام فيصل جا لموسى

*وقال ليهو انت ياموسى بتلعب معانا كم سنة؟

*موسى قال ليهو ستة سنين ياكابتن

*العجب قال ليهو ستة سنين تعتذر ياموسى؟؟ طوااالي تعتذر ياموسى ؟خلينا مرة واحدة نعتذر ليك

*المهم

*المواطن السوداني في الحلة بقي زي فيصل عجب مع موسى

*طوااالي بعتذروا ليهو

*سيد الدكان من يشوف المواطن يعتذر طوالي قبل ما المواطن يطلب دين

*وسيد اللبن

*وبتاع الركشة بقبل كدة ويفحط

*وبتاع الفرن

*العيش راااقد لكن بقول ده بتاع ناس

*لانو عارف المواطن جاي يشيل عيش بالدين

*حتى بتاع الصيدلية بعتذر

*بتاع الخضار بقبل في اتجاه الحمار

*والحمار يعمل فيها (عار) ويفنجطوا هروبا من الدين

*الدنيا كلها زي موسى الزومة

*طواااالي تعتذر للمواطن قبل يفصح عن طلبو

*وطبعا طلبو بالدين

*لاعندو كاش يقلل النقاش

*ولا عندو نقاش بسمعوهوا ليهو الناس اللغفوا الكاش

*انا ذاتي القصة دي حصلت لي

*في بتاع طبلية جمب المحكمة الشرعية اسمو الصافي

*ولد مهذب وعصامي

*وبعاملنا كويس

*مرات يدينا سجاير او رصيد او حتى كاش

*ومرات يصرف لينا بنكك

*لكن الدين كتر عليهو

*امس وانا قاعد جمب الشرعية (شلن) ماعندي

*كوركت للصافي

*طوالي قال لي زين الشبكة كعبة والليلة ماجبنا بينسون

*الديون خلت الصافي يعتذر اسرع من اعتذار موسى الزومة

*التحية لموسى الزومة الظريف

*والتحية لفيصل عجب الراقي

*والتحية للصافي الذي تحملنا كثيرا

*والتحية لجبريل الذي ساعدنا على كشف معادن الناس

*اها

*نجي لي شمارات والي الخرتوم

*كان شفت يا والينا

*كل الخوف انك لما تشوفنا تعتذر لينا

شمارات الكلب

ننساك كيف والكلب قال مرة في كلب هزيت ليهو ضنبي اعتذر لي….ملعون ابو العضم الكان شايلو في خشمو

والى لقاء