شمارات.. سلك | مستشفى تركي

*المسلسلات التركية بقت عندها جماهير تفوق جماهير القمة

*الكلام الحلو الفيها (مهند ونور) أدهش السودانيين والسودانيات بالذات

*الواحدة ببجاحة تسمع كلام مهند

*تطلق زفرة طويييييلة وتقول

*الراجل السوداني مارومانسي

*رجالنا مابعرفوا يقولوا لينا كلام زي ده

*أسي البلولة ده بعرف معنى كلام مهند القالوا لي نور ده؟؟؟

*وهي ناسية انو نور لو نطقت اسم البلولة بتفقد سوائل

*ياخ خليها نور

*مهند لو نطق اسم صاحبتنا دي بتجيهو لوز والتهاب حنجرة

*أم بخت !!!!!

*معقولة ياخ؟؟؟؟

*المهم

*الدهشة في المسلسل التركي

*ليست في الرومانسية فقط

*بل في الشوارع النضيفة (حفرة مابتعتر ليك)

*في الأشجار

*في الأناقة

*مرات في الهدوم الشوية

*وفي أثاثات البيوت

*في النضافة والناس القيافة

*وفي حاجات كتيرة

*شخصياً عشت دهشة المسلسل التركي بعيداً عن الشاشة

*كرعيني الطوال ديل ودني معايداً لبنت عمي بمستشفى يونيفيرسال شرق كبري كوبر

*ولدت وأنجزت ياعمي

*المستشفى من باب الشارع مدهش

*مسلسل تركي ألف حلقة

*إبداع عمران

*اناقة تشطيب

*يشهي في المرض

*نضافة نضافة تحير مهند لو نور رقدت فيهو

*كل شي مدهش

*بصراحة مابشبهنا

*لا (فيط) مقشوشة في حيطة

*لاسفة واقعة في سلم

*الاسانسيرات زي الهايسات في جاكسون

*كتييييرات

*موش لافتة جوار الاساسنير

*هذا الاساسنير مخصص للمرضى

*وتلقى المريض نقالتو أطول من الاساسنير

*والباب ماداير يقفل

*يضقلموهوا بي نقالتو عشان يقفلوا باب الاسانسير

*مستشفى ما بشبهنا

*حتى العاملين

*كلو زول لابس زي معين

*يعني مابتحتاج تسأل

*هذا الإنجاز إعجاز

*والإعجاز الأكبر لو حافظنا عليهو كده مدهشاً كما المسلسلات التركية

*ماحبيت أسأل عن تكلفة العلاج

*حتى لا أفسد الصورة الجميلة والمدهشة التي رسمتها للمستشفى

*المهم

*المستشفى شدت مامسلسل تركي

*زوج بت عمي جا داخل عليها في الغرفة شايل ورود

*بت عمي (حكت) عيونها وقالت ورود؟؟؟

*البنج ده لسة مافكة ولاشنو؟؟؟

*أيها الناس

*ليه حاجتنا كلها بتبدأ كده

*ثم نملاها صعود وقرف وفييييط وفي القزاز؟؟؟

*هل تشييد مثل هذه الصروح يطورنا

*أم تطوير سلوكنا هو مايحافظ على هذا الجمال المدهش؟

*أيها الناس

*إن للحفاظ على هكذا جمال مدهش تكون مسؤولة عنه الإدارة

*ومسؤول عنه المواطن الذي يستعمل تلك الخدمات

*يبقى تغيير السلوك ايجاباً هو المخرج

*المخرج الذي يخرجنا من الجفاف العاطفي بين البلولة وأم بخت

*ويجعل بوكيه الورد على أي لسان

*وغنماية ما تتعدى عليهو

*أها

*نجي لي شمارات والي الخرتوم

*كان شفت يا والينا

*ناس المطاعم والكافتيريات يومي الموية في الزلط يكشحوها لينا

*وطالما انتوا دايرين ايرادات يا والينا

*ونحنا محتاجين تغيير سلوك وجمال المدينة

*رأيكم شنو زي ديل تكون الغرامة مليار جنيه على كل نقطة موية يكشحوها لينا

شمارات الكلب

ننساك كيف والكلب قال الله ماخلق حتة وسخانة….البشر بحافظ على فطرة النضافة والنظام والغجر بوصلها للدرجة الشايفنها دي

وإلى لقاء

 

#شمارات #سلك #مستشفى #تركي #المسلسلات