شمارات.. سلك | شفعنا شيبوا

*نعيش في السودان زمان شاب فيه الولدان

*وبرغم ذلك لسة الكبار مامقتنعين بانو لكل زمان رجاله ولغته

*سيدنا علي ابن ابي طالب رضي الله عنه قال

*ربوا اولادكم لزمان غير زمانكم

*نحنا في السودان دايرين الشافع يطلع صورة طبق الاصل لجده السابع عشر

*لانؤمن بحق الشباب في التعبير

*ولا حقهم في التدبير

*ولا حقهم في ادارة شأنهم

*الشفع بياكلوا بعد الكبار

*الشافع يقول سمعا وطاعة دون ادني حق للسؤال او التعبير او ابداء الرأي

*وبنفتكر ده أدب وحسن تربية

*حتى توالت اجيالنا مهضومة ومقهومة

*وهي بدورها تمارس تلك السلبيات

*سلبيات السلف تمارسها مع الخلف

*وهكذا دواليك

*فيكم زول يوريني ليه مادايرين نعترف للشباب الصنع الثورة بحقه في ادارة الدولة؟؟؟

*مع العلم بان الحاضر حقهم والمستقبل حقهم

*اذن لماذا يضايقهم من يقف على حافة القبر في امر مستقبلي مابحضروا هو ذاتو؟؟؟؟

*ايها الناس

*كل الاتفاقات

*اطاري

*اجباري

*مؤقت

*طوالي

*ان لم يكن الشباب ممثل فيها باكتر من ستين في المية

*صدقوني بتبقي، ضياع زمن

*والكاكي بلعب على الزمن

*الذين يجعجعون فينا بحثا عن كراسي

*لم نذهب لوداع احدهم مستشهدا

*ولم نعاود احدهم مصابا في موكب

*ولم نبحث عن احدهم مفقودا في اعتصام

*اذن سبب واحد يخليكم تتنافسوا على كراسي الحكم فينا مافي

*الثورة ثورة شباب

*والزمن زمن الشباب

*والمستقبل حق الشباب

*حقو نجدع الشايب بايظ

*ونقفل غطا عام على دوهات وتريسات

*عشان نجر كل المؤامرات خمسين

*المهم

*سمعت بانو في حفلة كدة تحييها فنانة (حارسة مرمى)

*جات منقبة

*ووقعت قلدي وحضن في الفنانة

*والفنانة بادلتها التعبير بتعبير

*وفي الآخر اتضح ان تحت النقاب سنجاب

*ماسنجابه

*سنجاب

*المحيرني

*الفنانه دي لو مابتشوف

*مابتحس؟؟؟

*مفروض حساساتها يحسسنها

*وكان مابتحس

*مابتشعر؟

*غايتو جنس غايتو

*البلد دي تاني ماتثق في زول الا يجي ماشي (ساي)

*لانو اي لبس معناها لابسو فوق راي

*اخير نحوم ساااااي

*اها

*نجي لي شمارات والي الخرتوم

*كان شفت يا والينا

*مسخت ليالينا

*نندمس نقبل على الحيطة بقينا

*من الهم الفينا والدفسي الراجينا

*نقبل كدة ونزوغ يا والينا

شمارات الكلب

ننساك كيف والكلب قال نحنا بندي الجريوات فرصة يعبرن وينبحن عشان يتعلمن الحراسة ويعرفن لما يكبرن حب الوطن والقداسة.

والى لقاء

#شمارات #سلك