المشكلة ما في (الفول) المشكلة في الزيت …!
صبري محمد علي (العيكورة)
الاعجاب الذي ابداه السفير الامريكي بالخرطوم السيد (جون غودري) خلال تغريدة له عبر(التويتر) بصحن الفول وملحقاته الذى تناوله بالدمازين خلال زيارته الاخيرة . وقال عن القهوة السودانية انها (مشروبه المفضل) ! ما تسألني هو قال كده …
سبقها بزيارته لمروي وانتشرت له يومها صور يلعب (الدافوري) مع عيالنا واخرى له وهو يتصفح تمر (البركاوي) الذى اذل به البشير اعمام (غودفري) ذات يوم
يعني ….
معليش خلوني اسأل حكومتنا الراكزة دي
هل زيارات الزول ده تمر عبر القنوات الامنية والدبلوماسية كما هو معمول به عالمياً ام ان
(جماعتنا بدوه الفاتحة ساكت) ويقولوا ليهو توكل
(البيت بيتك) !
وهل هناك وجود امني يتتبع ولو من بعيد خطوات هذا الرجل ام ان الاسرار و المواقع والتصوير متااااح (طالما انه امريكي وكده)؟
ثم هل (بروتوكولياً) مسموح له ان يلتقي الولاة والضباط الاداريين قافزاً فوق كل التسلسل الهرمي للدولة ؟ ده بافتراض إنو عندنا حكومة محترمة ومالية هدوما .
ما اعلمه ان هناك دائرة مسموح للسفراء التحرك بداخلها ولكن بعلم واذن وتحت بصر دولة المقر فهل يا ترى (برطعة) الزول ده ناس عمنا علي الصادق جايبين ليها خبر ؟ واللا ناس المخابرات صادقوا على برنامج الزيارة من (قولت تيت) وحتى رجوعه بالسلامة .
إعلامنا للاسف ….
يركز وحسب طيبتنا على القشور لمثل هذه الزيارات وصحن الفول و(مش عارف) الزيت والجبنة والبصل والشوق والريد كمان وماذا اكل وماذا شرب ! ولكن (برأيي) ليست المشكلة بماذا فطر (الشيخ السفير) الامريكي ولكن المصيبة …
شاف شنو ؟
وصور شنو؟
ورفع تلفونو كلم منو؟
والجماعة المعاهو العاملين فيها اعلاميين ديل . سجلوا (احداثيات) اي موقع وهم يتظاهرون بالظرافة والانبساطة المزعومة . ده الكلام المفروض الناس تخلي بالها منه !
(لا وكمان) …
والي النيل الازرق لابس ليهو بدلة ! احتفاءً بالضيف
يا جماعة زي ده بفكوا ليهو اولادنا بتاعين الامن ليحصوا عليه حركاته وسكناته و لا يساورني شك لدينا بالجهاز (شفوت) لو اطلقت يدهم وعقولهم وتقانتهم لعدوا لنا (قرقرات بطنه) ! ناهيك عن ماذا ارسل وبم تحدث!
فااا حقو ….
يا اخونا نبطل الطيبة الزائدة بتاعتنا دي شوية
ياخ ما معقول …
السفير الفلاني متعشى كوارع فى الموناليزا ومش عارف السفير الفلاني ماخد سيلفي مع ست الشاي سامية (غُنانة) و(مش عارف)
واحد تاني شايفين عربيتو قدام محل (آدم شية) فى مدني!
يا جماعة …
الفوضى دي حدها وين ؟
قطعاً …..
من هيبة الدولة إيقاف مثل هذه (البرطعة)
كيفن ؟
اسمعني اقول ليك …
انت مندوب السفير الفلاني …؟
نعم ..
عاوز اذن؟
نعم سعادتك
امشي جيبو مكتوب ومعاهو برنامج تفصيلي للزيارة وتخليهو يمشي شوية وتنادي تاني وعليهو (الدمغة) المقررة نظاماً وبعد داك تعال .جابو ليك؟
قول ليهو امشي قيدو فى الاتصالات الادارية وخذ رقمه وتفضل امشي و سنتصل عليك!
خلاس كده؟ انتهينا من خطوة التقديم وكده؟
بعد داك ..
توريهو رقصة ابو القدح
على مهلتك .
و(اقعهم ليك) بالاسئلة الما ليها لزوم ديك (انتا ما جهاز امن دولة .. فى سفير يتجرأ يقول ليك تلت التلاتة كم) ؟
طلبات من نوع …
مؤهلات السفير شنو ؟ إرفاق صورة موثقة من سفارتنا فى بلده، الغرض من الزيارة ، السيرة الذاتية ل (جد) السفير ، حبوبتو ! حصلت على جنسية بلدها بالميلاد ام كانت بالتجنس، هوايات السفير (برضو لازم تعرفها) ، شهادة حسن سير وسلوك ، آخر مرة مشى فيها السفير للحلاق متين؟
وهكذا …
من نوع الاسئلة ابوكديس ديك
تعصروا لممن يجيب الزيت وآخر حاجة ….
تشرح عليه يرفع للجهات المختصة لاخذ التوجيه
غير كده هؤلاء السفراء لن يعرفوا اوزانهم الحقيقية صدقوني .
ولن يحترموا شعبنا ولا ما تبقى لنا من شتات حكومة .
قبل ما انسى : –
غير ذلك إن استمر هذا التراخي فلا استبعد ان نشاهد بعضهم يشرفون حفلات تعليم (رقيص العروس) !
فااااا يا …
اشتغلوا صاح يا زحوا لينا نوريهم منو الطفى النور .
ملاحظين معاي ….
ليس بالسودان رجل واحد من مدعي السياسة ومنذ ان ذهب البشير نطق بكلمة (بركاوي) مجرد نطق .
