العيكورة يكتب: الشمار ده كان أمس

بقلم. صبري محمد على (العيكورة)

الشمار ثلاثة انواع شمار قيل لك وشمار شممته ولم تراه وشمار نقل لك من شمشار معتمد رسميا لدي اجهزة الدولة . وفى الحالة دي عليك ان تتذكر قول الشاعر:

(ان قالت حزام فصدقوها فإن القول ما قالت حزام)

فالشمار المنقول كالذي يدور هذه الايام عن تجهيزات القحاتة واعداد (البوسترات) والملصقات و تحديد الشقق التى تجهز فيها وبتاع التامين الجالس بجوار ست الشاي طول اليوم تحت الشجرة يراقب الموقع (الود قال بتاع تأمين قال) وحاجات بالشكل ده .

وشمار اخر لا انت شايفه ولا من اطلقة ضايق طعمه فهذا كالذي يفعله (المنظراتي) عثمان ميرغي هذه الايام وهو شمار يطلق مع الرياح العاتية و لا يخلو من الصراخ (الحقووووا) كقوله قدس الله سرة وفضح كذبه ان فنادق السوق العربي والشقق المفروشة قد تم حجزها بالكااااامل للقحاتة استعدادا لليوم الموعود فى الثلاثين من يونيو !

ياخى ده قال ليك حتى برج القذافي زاتو حجزوه .

فذاك شمار لا يملك متلقيه الا ان يضرب يد بيد ويتحوقل ! و ينادي باعلي صوته يا عثمان ياخ ما جبتها كبيرة لكن .

و هناك الشمار الناااعم كالذي نشرته بالامس الناشطة التائبة العائدة من اتون القحاتة (تبيان توفيق) التى قالت ان جميع طلبات الحجوزات قد قوبلت بالرفض من ادارات الفنادق واصحاب الشقق المفروشة بوسط الخرطوم و مثل هذا (الشمار) يتقبله العقل والمنطق فيمكن لاجهزة المخابرات والمباحث ان تكون سبقوهم (و عملوا الواجب) او كالذي يقول ان خطاط القحاته زائد الجرعة فكلما كتب (الشعب) اضاف للعين نقطة لتصبح (الشغب) وتبيان تطالبهم بتقليل الجرعة . جرعة شنو ؟ علمي علمك ياعب باسط .
فمثل هذا ياعثمان يسمي (بالشمار اليقين)
ومن الافضل تاني لو ما تابعت (المصيبة الاسمها تبيان دي نشرت شنو) ما تستعجل تطلق لخيالك العنان . وتسوق الاماني العذبة للقطيع.

الشمار (الدراااش) ده زي حقنا نحن الافارقة فبالامس ناس الاتحاد الافريقي جماعة (حاج ابكر) المنسحب من الالية الثلاثية بعد ان طارت بهم الاسافير بين مؤيد و ساخط ولربما وصلهم راس السوط من الامين العام للامم المتحدة (الضب الكبير) معاتبا على نشر مثل هذا الغسيل (الما محترم ده) .
فالاتحاد الافريقي (قال ليك) يا ولد خلينا نلم الموضوع فطلعوا ببيان البارحة قالوا فيه يا جماعة (انتو فهمتونا غلط) وان ما صرح به مندوبنا فهم فى غير صياغه المراد ! يا عب باسط انت مركز معاي ؟ يعنى الحكاية جابت ليها نطة بلا خجلة !

ياخي هل هناك معني اخر لجملة انعدام الشفافية وانعدام الصدق والمراوغة والتضليل والتفريق بين المتحاورين ! الكلام ده داير ليهو فهم ؟ مش ده ياهو كلام حاج ابكر بتاعهم ؟

اهااا قال ليك (الخال) حاالف يجوا راجعين واكد (حفظه الله) على اهمية دور الاتحاد الافريقي فى تسهيل العملية السلمية و … و….. كلام كده من النوع المرتب داك (والله قالوا من راسو واللا من كراسو) دي ما شغلتي امشوا اسألوا ناس مكتبو لكن قالوا حلف عليهم عديييل إلا يرجعوا .

شمار ايضا منسوب لعمنا ابوالقاسم برطم عضو المجلس السيادي (كشف) فيه وخلى بالك من كلمة كشف دي! قال ليك كشف التدهور المريع فى قطاع السكر و انه اجتمع مع لجنة مختصة لتدارك هذا (التدهور) المريع ضمت وزير المالية والصناعة والتجارة . و قال ان نسبة انتاجية السكر قد تدنت لاقل من ٨% ! طيب وانت قاعد بتعمل فى شنو يا حاج؟

اقول ليك انا ؟
شخصيا اشك فى صحة هذه النسبة اذا كان زماااان ايام (ابراهيم السيخ) و الحكاية كانت (مرطبة) نوعا ما كانت نسبة الانتاج ١٠% فقط بتراجع الانتاج من [٣٠٠] الف طن فى السنة فى عهد الكيزان (الله يطراهم بالخير) الى [٣٠] الف طن فقط فى زمن [القحاتة] دي كده بالميييت تمثل ١٠% وده كان زمن ايام ابراهيم الشيخ الذي كان يغبر شعره المصبوغ ساعة فى سبيل الله يوم طلع زيارتين لسنار و عسلاية على ما اعتقد وارسل يومها الصور (الماخمج) (بالفل سوت) بجوار جدول اب عشرين

فحاليا يا عمنا برطم (صدقني) النسبة (البتقولها) فى احسن حالاتها قد لا تتجاوز ال ٣% .

على كل حال نتمني للجنتكم (المؤقرة) ان يكتب لها التوفيق كما كتب لها سابقا فى ملف (شراء القمح) !

قبل ما انسى:-
عزيزي القارئ خذ من الشمار بقدر حاجتكم وخصوصا هذه الايام
فصحتكم تهمنا .