شمارات.. سلك | الجاتنا تختانا

*المتأمل في الشعب السوداني تاريخياً

*يجده شعباً منكوباً حد الثمالة

*تجي من السما ده

*تتلقاها (واطات) شعبنا المقهور

*بعد مرقة إخوانا في الله الانجليز

*جاتنا أول حكومة سودانية

*قعدت بعض سنة ونيف

*وجاتنا حكومة جديدة فجأة

*حكومة بدون انتخاب

*حكومة بالكاب

*حكووووومة

*حكومة (بالعا)

*الجاتنا ماختتنا

*وعشنا ست سنوات نبتهل

*الجاتنا تختانا

*الجاتنا تختانا

*الجاتنا تختانا

*ربك رب الخير بحب العبد اللحوح

*ونحنا نعجبك

*الجاتنا تختانا

*الجاتنا تختانا

*وربك رب الخير قال آمين

*وجاتنا حكومة

*أسكت بس

*جبناها برانا

*ورجعنا نبتهل

*الجاتنا تختانا

*جبناها برانا

*ياربي تختانا

*والجاتنا

*قامت جاتنا

*جاتنا الابت تختانا سطاشر سنة

*مهما ابتهلنا

*وانبهلنا

*ربك رب الخير ماحلحلنا

*قمنا انبهلنا البهلة الياها

*وانهبلنا سنة

*وجاتنا الجبناها تاني برانا

*خجلنا المرة دي

*لا انبهلنا ولا ابتهلنا

*قعدنا صامين خشمنا في هبلنا

*وجاتنا في صمة خشمنا

*الابت تختانا تلتين سنة

*لاخجلوا

*لاخجلنا

*لاشبعوا

*لاكملنا

*لاخلوا شبر في أرضنا

*لاتركوا شوك يزربنا

*بقوها دلجة وريسينا دلجة

*والسوق الأفرنجي ملجة

*دخلوا بينا وربنا

*بين بصلة الأسرة وقشرة عرضنا

*ماهاميهم كان متنا كان مرضنا

*ونحنا نقول ياربنا ياحقنا

*ياربنا وياربنا وياربنا

*ياحقنا

*تلتين سنة

*وربك رب الخير يمهل هنا

*وينذر هنا

*وبعضنا لحسنا كوعنا

*ونحنا شغالين

*ياربنا وياربنا وياربنا

*ثم وقفنا عند

*وقل اعملوا

*وعملنا (ضبان ضكر) بعد عملنا حميل

*وانبهلنا

*مرقنا كلنا

*ودخلوا هم

*لالحسوا كعوهم زينا

*لا باعوا بيت في حينا

*وجطناها كلنا

*ورجعنا نبتهل

*الجاتنا تختانا ياربنا

*في صمة خشمنا جاتنا تزيد همنا

*ياربنا ياربنا ياحقنا

*خجلانين شديد

*لكن العشم فيك والثقة أكبر من البنسوي فيهو كلنا

*تقول شنو

*حركات شفع ياربنا

*أها

*نجي لي شمارات والي الخرتوم

*كان شفت ياوالينا

*زماااان حبوباتنا بقولن تجيك الطاوية حبالها

*كنا بنضحك يا والينا

*كنا صغار لاعارفين لافاهمينا

*أسي كبرنا

*وعرفنا الطاوية حبالها الجاتنا

*والجاتنا تختانا

شمارات الكلب

ننساك كيف والكلب قال صمة خشمكم دي الضيعتكم من يوم مرقوا إخوانكم الانجليز …. القحة ولاصمة الخشم… زغرودة وهتاف والبتجيكم بتفرحكم

وإلى لقاء