شمارات.. سلك | غرد ياكناري

*عند تغريدة للأديبة الأريبة الحبيبة سهير بت عمك عبدالرحيم

*وقفت

*ووقف الزمان برهة

*برهة لاتحتاج لبرهان يثبتها ولا لشمس تظهرها

*جاءت التغريدة بعنوان التعيس وخايب الرجا

*ثنائية لا تفترق في (حنكنا) السوداني

*وما أكثر الثنائيات في بلدنا دي

*بشرى وبشارة

*السيدين

*السيد والسيد

*حمد والديبة

*سانتو وكمال

*الدحيش وقاقرين

*ثنائيات كتيرة عرفها مجتمعنا

*منها الناجح جداً

*ومنها النص نص

*ومنها الفاشل بامتياز

*ولاتوجد ثنائية تنافس ثنائية التعيس وخايب الرجا في الفشل

*تغريدة سهير كانت واضحة كعادتها

*وخلاصتها ماعدنا كشعب نثق فيكم كلكم بدون فرز

*وأنا أضيف على تغريدة الدرة الفريدة الشايلة الجريدة

*لو نحنا وثقنا فيكم يا (كلكم)

*اكيد انتوا ماتثقوا فينا كشعب بسبب ثقتنا فيكم

*فثقتنا فيكم تخصم مننا ومابتزيدنا

*تخصم من فهمنا

*تخصم من مستقبلنا

*تخصم من ارتباطنا بوطننا

*تخصم حتى من باقي العمر الفضل لينا

*لاتوجد بوادر

*ومات أمل تحويل الخلا لي بنادر

*وبقينا نخاف من باكر

*نثق فيكم كيف بس؟

*خلونا نحنا

*انتوا واثقين في أنفسكم؟؟؟

*كلكم

*واثقين في أنفسكم؟

*واثقين (بالثا)

*أيها الناس

*البلد دي زي مكنة العربية

*الصوت النشاذ ده ماتحت في الكرنك

*الصوت ده فوووق

*صوت روكر

*في الراس

*حقو نغير الراس بي بلوفتو عشان نحافظ على مكنتنا

*الراس دي بخرب المكنة وبخليها تدخن وتكسر شمبر وتاكل سبائك

*ماسبائك دهب

*سبائك الدهب مابياكلها كرنك الشعب الجامع الضراعات لأجل مكنة مدورة صاح تقود العربة لبعييييد

*الدوروا بعدنا كلهم وصلوا

*إلا نحنا

*لازلنا في محطة المحنة

*غيروا الراس حفاظاً على مكنة الدولة

*أقول لأستاذتي سهير عبدالرحيم

*غرد ياكناري وحاكي العندليب

*وأقول لي ديك (كلهم)

*لاتحسبوا ضحكي بينكم طربا

*فالطير يرقص مذبوحا من الألم

*أها

*نجي لي شمارات والي الخرتوم

*تعرف يا والينا

*أقسى حاجة في المدينة

*وأقصى حاجة ممكن تلم بينا

*لما تغرد الطيور على أطلال أغصان المدينة

*وهي حزييييينة

شمارات الكلب

ننساك كيف والكلب قال وأجمل أغنية طيري ياقمرية وركي فوق الزنكي اتصنتي القضية

وإلى لقاء.