شمارات.. سلك | بتختاري منو يابتي؟

*جارنا راجل بروف وقمة الهرم الأكاديمي

*عندو ولد بتاع أساس كدخ

*جنو لعب

*القراية دي مابحبها نهائي

*ولا بحب سيرتها

*ولد لعبنجي لكن فوق راي

*المهم

*قبل إضراب المعلمين الأخير ده

*الولد جاب نتيجة الاختبارات الشهرية

*وهي شن النتيجة

*أسكت بس

*لو كان غاب من الاختبارات كان جاب نمر أكبر من الجابها دي

*المهم

*الابو زعل داير يطق

*بروف عاد

*ما بقبل ابن فاشل أكاديمياً

*قام وبخ ولدو توبيخ شديد

*وبصراحة عصر على الولد شديد

*وأحرجو قدامنا

*البروف ختم التوبيخ بعبارة ماعافي منك

*الولد عاين لابوهو وقال ليهو

*ماعافي مني يا أبوي؟؟؟؟ أنا الماعافي منك

*جبت لي معلمين خصوصي في البيت ستة للمادة الواحدة يايمة؟؟؟

*دخلتني مدرسة انترناشونال بالدولار يايمة؟؟؟

*وديتني إجازة ماليزيا يايمة؟؟؟؟

*طهرتوني في الأردن يا يمة؟؟؟؟

*كسيتوني من لندن يايمة؟؟؟؟

*خميس وجمعة بتودوني الإمارات آكل كنتاكي وأرجع يايمة؟؟؟؟

*بنيت لي غرفة خاصة في الطابق التالت أعيش فيها حياتي بي حرية يايمة؟؟؟؟

*ماياهو جخنون الإيجار ده غرفتين جالوص خلف خلاف بي برنداتن

*أنا الماعافي ليك يا أبوي

*البروف اتحرج

*خش في ضفورو

*وقال لي ولدو

*بتعيرني بظروفي المادية يا ولد؟؟؟

*الولد قال ليهو ظروفك المادية اخترتها براك يا أبوي

*في زول في البلد دي بضيع زمنو في القراية لما يبقى بروف يا أبوي؟؟؟

*انظر حولك يا أبوي

*أحسن الناس اقتصادياً في البلد دي الواو الضكر مابعرفوها

*أسي فلان

*قرأ شنو يا أبوي؟ وقرا وين؟ ياهو هيبة ومهابة ومال عشان عرفها وكسب زمنو وماضيع وقتو في القراية

*أنت دايرني اقرأ ليه وتتكرر مأساتك من جديد؟؟؟؟

*خليهو فلان

*فلتكان

*وفاتيكان

*وسيد الدكان البتتدين منو حق المواصلات وأنت ماشي الجامعة عشان الأجيال تنهل منك علم وأنت بروف علمك مابقدر يصمد قدام أجرة مثل مطالب بيها سيد البيت الجالوص المستأجرنوا منو

*قراية شنو يا أبوي

*دعوني أنطلق

*فالانطلاقة وحدها هي التي تضمن مستقبلي في وطن علماؤه أجهل ناسه بالمال

*بلد عاليها  واطيها

*وواطيها منارات علم وأدب وأخلاق

*جميعنا صمت

*الولد ده خارش ولا الآيس ده بايظ

*ولا الخارشين نحنا؟؟؟؟

*فجأة جات طالعة أخت الولد دي الصغيرة

*قلت ألطف الجو

*قلت ليها أهلاً بعروستنا

*انتي لما تكبري بتعرسي دكتور ولا مهندس ولا محامي؟؟؟

*قالت لي ولا واحد من ديل

*قلت ليها إذن بتعرسي ظابط

*عاينت لي وماردت

*قلت ليها مادايره تعرسي يعني؟؟؟

*قالت لي أنا لما أكبر كان عرست بعرس واحد من الناس البقولوا للمليار منيار

*أنا والبروف قررنا نمشي نتعالج من الإدمان

*فقد يكون الآيس هو سبب هذا الخنوع الذي لاتعرفه الأجيال الصغيرة

*أها

*نجي لي شمارات والي الخرتوم

*والينا المكلف علينا

*دكتور ولا مهندس ولا (منيار) يا والينا

شمارات الكلب

ننساك كيف والكلب قال منيار هينة والله في ناس منيار دي مابعرفوا يقولوها لكن خامنها خم

وإلى لقاء.