شمارات.. سلك | الزلزال والتلج

*كسير التلج ماجديد في الدنيا دي

*قديييييم

*حتى قبل ظهور التلج

*وقبل خلق المكسر (بضم الميم) له التلج

*وقبل اكتشاف المكسر لأجله التلج

*الناس كانت بتكسر التلج

*بدري الكلام ده

*لكني أشهد بأن الهالك أبو لهب يكاد يكون الشخص الوحيد في العالم الماكسر تلج

*موقفو كان واضح من البداية وحتى النهاية

*أياً كان موقفو

*إلا انو والشهادة لله ماكسر تلج

*بمناسبة زلزال تركيا

*الناس اختلفت حول الموضوع

*ناس قالوا مازلزال طبيعي ولكنه نتاج تجربة نووية أمريكية تحت البحر

*واستدلوا على ذلك بتلك الحشود الأمريكية على تلك الجزيرة المنسية

*وأكدوا ذلك بأن تلك الحشود الآن داخل تركيا لإنقاذ مايمكن إنقاذه

*ناس تانيين قالوا نتفق على أن الإنقاذ هو سبب زلزال تركيا

*واختلفوا حول الحشود الأمريكية كسبب

*وأكدوا ذلك بوجود معظم قادة الإنقاذ بتركيا

*فجروا إليها وابل الكارثة

*وناس قالوا ديل الروس

*والسوريين قالوا ده شغل إسلاميين

*وناس حلب قالوا إنها غضبة الله على البعثيين

*وكلو زول فسر حسب هواهو

*نرجع لموضوعنا

*كسير التلج والزلزال

*زمااااااان

*أيام حكم منو كدة ماعارف لمصر

*ضرب ليك مصر زلزال من أمو

*فرتقها ليك فرتيق الراكوبة

*قال ليك قبل الزلزال ده الغردقة كانت جوة الاسكندرية

*وأسوان جمب دمنهور

*والاسماعيلية قريب ليبيا

*الزلزال شتتها ليك شتيت الكتاحة

*قام واحد من كبار كسارين التلج في ذلك العهد

*استغل الزلزال

*وقال مادحاَ للحاكم

*مازلزلت مصر من كيد يراد بها

*ولكنها رقصت من عدله طربا

*ده خليهو

*باقي كسارين التلج في ديوان الحاكم قالوا

*إنه من المحسنات البديعية البليغة

*والذي نفس محمد بيده لهو أفضل مثال لحسن التعليل كمحسن لغوي من بديع البلاغة

*تقول لي علم وقنبلة ونووية وأمريكان!

*قال ليك رقصت

*مصر دي كلها

*لما هزاها ذلك الزلزال

*كان رقيص

*مصر حتتو وهي في قمة الطرب من عدل الحاكم

*يعني لو ده حقيقي

*السودان ده مفروض يحتو ويكشف الصباح الصباح

*من عدله

*أها

*نجي لي شمارات والي الخرتوم

*والينا المكلف علينا

*ماقلت لينا

*متين الخرتوم ده حاتحتو من عدلكم وتودينا؟؟؟؟

شمارات الكلب

ننساك